6 aı kezekte turady: depýtat júrgizýshi kýáligin alý tártibin ózgertýdi usyndy
ASTANA. KAZINFORM — Búgin Quryltaıdyń jalpy otyrysynda depýtat Meırash Shynasılova Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev pen Іshki ister mınıstri Erjan Sádenovtiń atyna joldaǵan saýalynda júrgizýshi kýáligin alý kezindegi qıyndyqtardy atady.
- Azamattar men avtomektepterdiń habarlaýynsha, Arnaıy halyqqa qyzmet kórsetý ortalyqtarynda emtıhandy uzaq kútýge týra keledi, keıde 6 aıǵa deıin sozylady. Bos oryndar lezde taýsylady. Jazylý tetigi ashyq emes, ıaǵnı qaı orynnyń kimge jáne qalaı berilgeni belgisiz. Ashyqtyq joq jerde aqyly deldaldar paıda bolmaı qoımaıdy. Máseleni tek qoldanystaǵy ınfraqurylym esebinen sheshý jetkiliksiz. Emtıhan qabyldaý oryndarynyń sanyn kóbeıtip, memlekettik organdardyń múmkindikterimen qatar jeke sektordyń áleýetin de paıdalaný qajet, - dedi Meırash Shynasılova.
Osy oraıda ol teorııalyq emtıhanǵa jazylý jáne kezekti qysqartý máselesine toqtaldy. Mamandandyrylǵan HQKO-lardyń jumys ýaqytyn azamattarǵa yńǵaıly bolý úshin uzartý jáne emtıhan qabyldaýshylardyń aýysymdyq jumysyn uıymdastyrý múmkindigin qarastyrý qajet. Sonymen qatar, teorııalyq emtıhandardy qabyldaý úshin qosymsha alańdardy – Ulttyq testileý ortalyǵynyń jáne Memlekettik qyzmet isteri agenttiginiń aýmaqtyq bólimsheleriniń bazasynda uıymdastyrý múmkindigin qarastyrǵan jón. Bul, kezekti azaıtýǵa jáne azamattardyń emtıhan tapsyrý múmkindigin arttyrýǵa yqpal eter edi.
- Eń ózekti másele – praktıkalyq emtıhanǵa kezek. Qazirgi kezde praktıkalyq emtıhan negizinen mamandandyrylǵan HQKO-lardyń avtodromdarynda ǵana qabyldanady. Mysaly, aglomeratsııany qosa alǵanda halyq sany 2 mıllıonǵa jýyq Astana qalasynda bir ǵana avtodromnyń bolýy máseleniń aýqymyn kórsetýde. Bul rette, jeke sektordyń múmkindigin paıdalanýǵa bolady: kóptegen aldyńǵy qatarly avtomektepterdiń óz avtodromdary bar. Sondyqtan, praktıkalyq emtıhan qabyldaýǵa qoıylatyn biryńǵaı tehnıkalyq, qaýipsizdik jáne uıymdastyrýshylyq talaptardy belgilep, osy talaptarǵa sáıkes keletin jeke avtodromdardy akkredıtteý arqyly emtıhan qabyldaýǵa tartý múmkindigin qarastyrý qajet. Osy tásildi teorııalyq emtıhanǵa da qoldanýǵa bolady, - dedi depýtat.
Sonymen qatar ol emtıhanǵa jazylý kezinde deldaldardyń qyzmetine tosqaýyl qoıýǵa qatysty usynys aıtty.
- Osyǵan baılanysty, emtıhanǵa jazylýdy tek eGov jáne eGov Mobile arqyly júzege asyrýdy jáne bos oryndardy avtomatty túrde bólýdiń ashyq ári qorǵalǵan tetigin engizýdi usynamyz. Bul kezekti satyp alýǵa nemese satýǵa jol bermeı, emtıhanǵa jazylý múmkindigin barlyq azamat úshin teń qamtamasyz etýge múmkindik beredi. «Aq jol» fraktsııasy Úkimetke kelesi tetikterdi júzege asyrý múmkindigin qarastyrýdy usynady. Birinshiden, kezekterdi qysqartý maqsatynda mamandandyrylǵan HQKO-lardyń jumys ýaqytyn saǵat 20:00-ge deıin uzartý jáne emtıhan qabyldaýshylardyń aýysymdyq jumysyn uıymdastyrý kerek. Teorııalyq jáne praktıkalyq emtıhandardy qabyldaý oryndaryn kóbeıtý úshin Ulttyq testileý ortalyǵynyń jáne Memlekettik qyzmet isteri agenttiginiń aýmaqtyq bólimshelerin qosymsha alań retinde paıdalaný, sondaı-aq belgilengen biryńǵaı talaptarǵa sáıkes keletin jeke avtodromdardy akkredıtteý arqyly emtıhan qabyldaý múmkindigin qarastyrý mańyzdy, - dedi depýtat.
Buǵan deıin Astanada júrgizýshi kýáligin jasap berýdi ýáde etken alaıaq 3 jyl 6 aıǵa sottalǵanyn jazǵan edik.
