6 aı ishinde shekaradan deklaratsııalanbaǵan valıýtalardy alyp ótýdiń 19 faktisi tirkeldi
Atalǵan fakti boıynsha Almaty qalalyq keden departamentiniń qyzmetkerleri tergeýge deıingi tekserister júrgizýde. Bul týraly Qarjy mınıstrligi Kedendik baqylaý komıtetiniń baspasóz qyzmetinen habarlandy.
«Azamattardyń deklaratsııa jasamastan kedendik shekara arqyly qolma qol qarajattardy alyp ótpek bolý oqıǵasy jıi kezdesedi. Máselen, aǵymdaǵy jyldyń 6 aıynda qazaqstandyq kedenshiler elimizdiń keden shekarasy arqyly valıýtalardy kontrabandalyq jolmen alyp ótýdiń 19 faktisin anyqtady. Atap aıtqanda, azamattardyń kedendik shekaradan ótý barysynda baqylaýdan jasyryp ótkizbekshi bolǵan 4 731 900 teńge, 486 350 dollar jáne 20 000 eýrosy tárkilendi», - delingen baspasóz baıanynda.
Toqtala ketetin jaıt, kedenshiler anyqtaǵan aqshalaı qarajattardyń basym bóligi Almaty halyqaralyq áýejaıynda, Qorǵas, Qordaı jáne Dostyq beketterinde oryn alǵan.
Osyǵan baılanysty, Kedendik baqylaý komıteti belgilengen talaptardy bilip, oryndaý ákimshilik jáne qylmystyq jaýapkershiliktiń aldyn alatynyn eskertedi. Atap aıtqanda, azamattardyń 10 000 dollarǵa deıingi qolma qol qarajattaryn ózderimen birge deklaratsııasyz ótkizýine ruqsat berilgen.
«Eger qundy qaǵazdar men vekselder ótkiziletin bolsa, nomınaldy qunyna qaramastan olardyń jazbasha deklaratsııasy mindetti. Bul rette aqshalaı qarajattyń zańdylyǵyn rastaý talap etilmeıdi», - delingen baspasóz baıanynda.
