6 adamdy órtten qutqarǵan aýyr atletıkadan Qazaqstan chempıony marapattaldy
ALMATY. QazAqparat –Almatyda órtten 6 adamdy qutqarǵan Qazaqstannyń aýyr atletıkadan chempıony Dáýren Rymqulov «Órtte kórsetken qaısarlyǵy úshin» medalimen marapattaldy, dep habarlaıdy QazAqparat tilshisi.
Alty adamdy, onyń ishinde tórt balany órtten qutqarǵan Dáýren Rymqulov QR Іshki ister mınıstri Erlan Turǵymbaevtyń buıryǵymen «Órtte kórsetken qaısarlyǵy úshin» medalimen marapattaldy.
Sportshyǵa medaldi Almaty qalasy Tótenshe jaǵdaılar departamentiniń bastyǵy Serik Áýbákirov tabys etti.
«Aınalany, adamdardy qorǵaýdy óziniń paryzy sanaıtyn naǵyz qazaqstandyq azamatqa tán batyldyq pen erlik kórsetkenińiz úshin alǵys aıtamyz, kóptegen jyldar boıy kásibı sportpen shuǵyldaný Sizge birneshe adamnyń ómirin saqtap qalýǵa múmkindik berdi»,-dep atap ótti Serik Áýbákirov.
Esterińizge sala keteıik, 14 tamyzda keshki saǵat 21: 33-te qalalyq Tótenshe jaǵdaılar departamentiniń «101» pýltine Almaly aýdany Radostovtsa kóshesi №49 úıden órt shyqqany týraly habarlama kelip tústi. Órt sóndirý brıgadasy oqıǵa ornyna kelgende bes qabatty turǵyn úıdiń úshinshi qabatyndaǵy páterdiń as bólmesi ashyq jalynmen janyp jatty. Óz ómirin qaterge tikken Dáýren órt sóndirý esepteri kelgenge deıin páterde qalǵan 6 adamdy qutqardy.
Shuǵyl jaǵdaılarda adamdardy qutqaryp, belsendi azamattyq ustanym tanytqany jáne jas urpaqqa úlgi kórsetkeni úshin Almaty qalasy Tótenshe jaǵdaılar departamentiniń basshylyǵy ony marapattaýǵa usynys jasaǵan bolatyn.
Dáýren bul áreketin erlik sanamaıdy. Kez kelgen adam qysyltaıań sátte osylaı áreket etetinine shák keltirmeıtin 33 jastaǵy sportshy Dáýren Rymqulov halyqaralyq týrnırlerdiń chempıony, Azııa men Álem chempıonatynyń qatysýshysy.
