6,5 mln. teńgeden astam ekonomıkalyq zalal óndirildi
ASTANA. 22 tamyz. QazAqparat /Qanat Mámetqazyuly/ - Mańǵystaý oblysynyń mamandandyrylǵan tabıǵatty qorǵaý prokýratýrasy ýákiletti memlekettik organdardyń tabıǵatty paıdalanýshylardan qorshaǵan ortaǵa normadan tys shyǵaryndylary úshin ýaqytyly qarajat óndirý máseleleri boıynsha tekserýler júrgizdi. Sondaı-aq, tekseris barysynda salyq jáne basqa da tólemderdiń ýaqytyly aýdarymdary qaraldy. Bul týraly QR Bas prokýratýrasynyń baspasóz qyzmetinen habarlandy.
«Saraptaýlar barysynda «QazMunaıTeńiz» Teńiz munaı kompanııasy» AQ-nyń 2011 jylǵy qańtar aıynda ruqsat qujattarynsyz ilespe gazdy jaǵýdy júzege asyrǵany belgili boldy. Atalǵan kompanııanyń gazdy jaǵýǵa qatysty Munaı jáne gaz mınıstrliginen alynǵan ruqsaty tek 26 qańtar kúni ǵana berilgen bolatyn. Osylaısha, kompanııa ilespe gazdy ruqsatsyz 26 kún boıy jaǵyp kelgen. Sondyqtan da, Mamandandyrylǵan tabıǵatty qorǵaý prokýratýrasy geologııa jáne tabıǵatty paıdalaný ınspektsııasyna suraý saldyryp, ekonomıkalyq zalal somasyn bekitý talabyn joldaǵan edi. Nátıjesinde atalǵan kezeń aralyǵynda «QazMunaıTeńiz» kompanııasynyń ruqsat etý qujattarynsyz 428 404 kýbmetr ilespe gazdy jaqqany anyqtaldy», - delingen baspasóz aıǵaǵynda.
Osyǵan oraı, keltirilgen zalal 6 mln. 300 myń 820 teńge shamasynda belgilengen. Budan bólek, kompanııa ákimshilik jaýapkershilikke tartylyp, oǵan 226 myń 800 teńge mólsherinde aıyppul salyndy.
