5G jıiligine arnalǵan ekinshi ashyq aýktsıon somasy rekordqa jetti
«Bir saǵat buryn №2 lot boıynsha 5G úshin radıojıilikterge arnalǵan aýktsıon aıaqtaldy. Aýktsıonnyń bastapqy baǵasy 1,761 mlrd teńgeni qurady. Saǵat 10:00-de eń qomaqty bastapqy usynys tústi - 20 mlrd teńge. Al 4 saǵattan astam ýaqyt ishinde soma rekordtyq 93,399 mlrd teńgege deıin ósip, aýktsıon aıaqtaldy. Jeńimpaz bolyp «Ksell» AQ jáne «Mobaıl Telekom Servıs» JShS-nen quralǵan konsortsıým tanyldy», - dep jazdy Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın áleýmettik jelidegi paraqshasynda.
Jeńimpaz tıisti ruqsat qujattaryn rásimdegennen keıin 3700-3800 MGTs jıiligine (100 MGTs) ıe bolady. Aýktsıonynyń qorytyndysy boıynsha respýblıkalyq bıýdjetke jiberilgen soma 156 mlrd teńgeni quraıdy. Bul qarajat ınternet sapasyn kóterýge arnalǵan jańa ulttyq jobany iske asyrýǵa baǵyttalady.
«Esterińizge sala keteıin, joba aıasynda 3 myńǵa jýyq aýyldy talshyqty-optıkalyq baılanys jelilerimen qamtamasyz etý, respýblıkalyq jáne oblystyq joldar boıymen optıka salý, sondaı-aq basqa da mańyzdy jumystardy atqarý eskerilgen», - dedi mınıstr.
Budan buryn habarlanǵandaı, 22 jeltoqsan kúni elimizde alǵash ret 5G úshin ashyq aýktsıon ótti.
«Búgin - Qazaqstannyń telekommýnıkatsııa salasy úshin tarıhı kún. Biz alǵash ret mobıldi baılanystyń besinshi býyny (5G) úshin radıojıilikterge ashyq aýktsıon ótkizip jatyrmyz! Aıqyn jáne ashyq túrde ótip jatqan básekede №1 lot boıynsha (3600-3700 MGTs jıilik) saýda-sattyq aıaqtaldy. Jeńimpaz - 62,669 mlrd teńge qarjyǵa ótinim bildirdi», - dep jazdy Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Telegram paraqshasynda.
Foto: facebook.com/BagdatMussin
