5G telefondar shynynda da zııandy ma - The New York Times
NUR-SULTAN. QazAqparat - «5G telefondar symsyz baılanys dáýiriniń avangardy sanalady. Kóptegen sarapshylardyń pikirinshe, jańa tehnologııa osy ǵasyrdyń artyqshylyǵyna aınalmaq. Degenmen, Aq úıge jaqyn ornalasqan telearna jelisi 5Gdiń kózge kórinbeıtin kemshiligi bar ekenin jáne ol adam ómirine zııanyn tıgizetindigin aıtty», dep jazady The New York Times.
«RT America jelisi «Adamzatqa jasalǵan qaýipti eksperıment» atty sıýjet kórsetti. Onda sarapshylar 5G adam densaýlyǵyna qaýip tóndiretinin aıtady. Tipti, mamandar sıýjette jańa júıe mı ragyn, belsizdik pen aýtızm nemese júrek aýrýy men Altsgeımerge shaldyqtyrýy múmkin ekenin málimdedi. Degenmen, bul pikirlerdiń esh ǵylymı dáleli joq», dep jazady basylym. Teris málimetti qadaǵalaıtyn New Knowledge kompanııasynyń dırektory Raıan Fokstyń aıtýynsha, bul ekonomıkalyq soǵys amaly bolýy múmkin.
«RT arnasynyń 5G tehnologııasyna qarsy shyǵýy amerıkalyq ındýstrııanyń 5G júıesin engizýdi arttyrýmen qatar kóbeıip keledi. Naýryz aıynda bul qyzmet túri 30 qalany qamtyǵan bolatyn. Al RT America 5G júıesiniń densaýlyqqa zııany týraly alǵashqy baǵdarlamany 2018 jyly mamyr aıynda kórsetken edi. Bıyl mundaı baǵdarlamalar sany jetige jetti. Degenmen, onda aıtylǵan tujyrymdardyń eshbiriniń ǵylymı dáleli joq», dep jazady avtor. Onyń aıtýynsha, 5G jańalyqtar ındýstrııasy, sport salasy, dúkender men kólik, densaýlyq saqtaý salasy, sondaı-aq qalalyq basqarý men úkimettik deńgeıde jan jaqty qoldanyla alady jáne jeliniń densaýlyqqa áserin zerttegen jahandyq ǵylymı zertteýler kóptep júrgizilgen.
«5G júıesine qarsy shyǵýshylar bul tehnologııanyń joǵary jıiligi telefondy densaýlyqqa zııan qylatynyn alǵa tartýda. Degenmen, ǵalymdardyń aıtýynsha, kerisinshe, radıojıilik joǵary bolǵan saıyn onyń adam terisine áseri azaıady. Sáıkesinshe, adamnyń ishki aǵzalaryna keri áseri az bolady», dep jazady avtor.
Templ ýnıversıteti Medıtsına mektebiniń radıologııa jáne medıtsınalyq fızıka professory Marvın Zıskınniń aıtýynsha, 5G oǵan deıingi jelilerge qaraǵanda qaýipsizdigimen erekshelenedi.
