5G jumys protsesimen qatar qyzmetkerlerdiń eńbek jaǵdaıyn da ózgertedi
ASTANA. KAZINFORM – «Qazaqmys» pen ISKRATEL arasyndaǵy kelisim óndiristik alańdardyń tereń tsıfrlyq jańǵyrtylýyna jol ashady. 5G, baılanys jáne ónerkásiptik ınternet tehnologııalary qyzmettik úderisterdi ǵana emes, qyzmetkerlerdiń eńbek jaǵdaıyn da ózgertpek.
«Qazaqmys» kompanııasy men slovenııalyq ISKRATEL (Kontron) kompanııasy tsıfrlyq tehnologııalar jáne telekommýnıkatsııalar salasyndaǵy yntymaqtastyq týraly Memorandýmǵa qol qoıdy. Bul qujat - qazaqstandyq ónerkásiptik kásiporyndarda jańa býyndaǵy júıelerdi engizýge baǵyttalǵan kezekti qadam.
Seriktestik baılanys pen 5G salasyndaǵy zamanaýı sheshimderdi, ónerkásiptik ınternetti (IIoT) damytý, sondaı-aq kompanııalar tobyndaǵy nysandarda kıberqaýipsizdik deńgeıin arttyrýǵa baǵyttalǵan. «Qazaqmys» úshin bul baǵyt burynnan strategııalyq sanalady, al ISKRATEL-men kelisim tsıfrlyq transformatsııanyń qarqynyn aıtarlyqtaı jedeldetýge múmkindik beredi.
Qujattyń basty maqsaty – tek formaldy tájirıbe almasý emes, naqty ári ólshenetin nátıjege qol jetkizý. Taraptar óndiristik shyǵyndardy qysqartýdy, úderisterdiń tıimdiligin arttyrýdy jáne negizgi alańdardyń tsıfrlyq jańǵyrýyn jedeldetýdi kózdep otyr.
Yntymaqtastyq aıasynda eńbek jaǵdaıyn jaqsartýǵa erekshe kóńil bólingen. Kompanııa ókilderi atap tkendeı, jańa tehnologııalardy engizý personaldyń qaýipsizdigine tikeleı áser etedi. Bólimsheler arasyndaǵy turaqty baılanys, jabdyqtyń senimdiligi jáne zamanaýı monıtorıng quraldary qaýip-qaterlerdi der kezinde anyqtap, yqtımal oqıǵalardyń aldyn alýǵa múmkindik beredi. Bul – óndiristegi kidiristerdiń azaıýy, apattyq jaǵdaılardyń tómendeýi jáne úderisterdiń turaqty uıymdastyrylýy degen sóz.
Memorandýmǵa sáıkes, taraptar 5G-tehnologııalaryn tájirıbelik-óndiristik synaqtan ótkizedi. Qujatta bul synaq olardyń tıimdiligin jáne qoldanystaǵy ınfraqurylymmen úılesimdiligin baǵalaýǵa múmkindik beretini aıtylǵan. Osylaısha tehnologııalardy aýqymdy engizýdiń ońtaıly joldary aıqyndalady.
Sonymen qatar, «Qazaqmys» pen ISKRATEL baılanys monıtorıngi men baqylaýdyń jańa júıelerin engizýmen birlesip aınalysady. Bul quraldar kásiporyndardyń aqparattyq jáne óndiristik qaýipsizdik deńgeıin arttyrýǵa múmkindik beredi, ásirese kúrdeli taý-ken metallýrgııa salasy úshin bul mańyzdy.
Seriktestik tıimdi kommertsııalyq sharttardy jáne uzaq merzimdi yntymaqtastyq baǵdarlamasy men pılottyq jobalardan bastap keń aýqymdy óndiristi engizýge deıin qamtıdy. Mundaı tásil óndiris toqtamaı-aq tehnologııalyq ınfraqurylymdy kezeń-kezeńimen jańartýǵa jol ashady.
Kompanııa ókilderi atap ótkendeı, ISKRATEL-men yntymaqtastyq jańa múmkindikterge jol ashady: zamanaýı baılanys standarttaryna kóshý, jabdyqtyń senimdiligin arttyrý jáne turaqty tehnologııalyq damýdyń negizin qalyptastyrý. Nátıjesinde «Qazaqmys» ındýstrııa 4.0 talaptaryna saı tsıfrlyq óndiris qurýǵa taǵy bir qadam jasaıdy.