59 myń patsıentke deıin dári-dármekpen qamtamasyz etemiz - Eraly Toǵjanov

NUR-SULTAN. QazAqparat - Qazaqstan aýrýhanalary koronavırýs ınfektsııasyn emdeý úshin qajetti dári-dármekpen tolyq qamtamasyz etilgen. QR Premer-Mınıstriniń orynbasary Eraly Toǵjanov osylaı deıdi, dep habarlaıdy QazAqparat tilshisi.

«Búgin Memleket basshysy Qasym-Jomart Toqaev pandemııa kezindegi dári-dármektiń baǵasyn kóterý faktileri boıynsha qatań shara qabyldaý týraly arnaıy tapsyrma berdi. QR Prezıdenti el azamattarynyń emine, olarǵa dárilik zattardy qoljetimdi etýge erekshe mán berip otyr. Negizi bul másele - Úkimettiń kún tártibinde turǵan negizgi jumystardyń biri. Sońǵy jyldary otandyq farmatsevtıka salasynda óndiris 7 esege artqanyn aıtqym keledi», - dedi Eraly Toǵjanov Ortalyq kommýnıkatsııalar qyzmetindegi brıfıng barysynda.

Onyń atap ótýinshe, búgingi tańda Qazaqstan aýrýhanalary koronavırýs ınfektsııasyn emdeý úshin qajetti dári-dármekpen tolyq qamtamasyz etilgen.

«Qazirgi ýaqytta mekemelerde 17 700 adamnyń jatqanyn eskere otyryp, bolashaqta kepildik bolýy úshin 27 myń patsıentke deıin dárilik zatpen qamtamasyz etildi. Munymen de toqtalyp otyrǵan joqpyz. Ary qaraı da naqty sharalar qabyldanyp otyr. Dári-dármekti qosymsha satyp alý 59 myń patsıentke deıin ulǵaıtylady», - dedi ol.