583 qonys aýdarýshy otbasy ekonomıkalyq utqyrlyq sertıfıkatyn aldy
2023-2027 jyldarǵa arnalǵan kóshi-qon saıasatynyń tujyrymdamasyn iske asyrý aıasynda bıyl ishki qonys aýdarýshylar úshin jańa tetik – turǵyn úı satyp alý úshin materıaldyq kómek alýǵa múmkindik beretin ekonomıkalyq utqyrlyq sertıfıkaty engizildi. Búgingi tańda sertıfıkattar 583 otbasyna berildi, dep habarlaıdy QazAqparat.
Sertıfıkat bir ret óteýsiz jáne qaıtarymsyz negizde turǵyn úı qunynyń 50% nemese bir otbasyna 4 mln teńgege deıin beriledi.
"Materıaldyq kómek Ulttyq bank bekitken ıpotekalyq baǵdarlama jáne (nemese) Úkimet bekitken memlekettik turǵyn úı qurylysy baǵdarlamasy sheńberinde turǵyn úı satyp alý kezinde turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin jergilikti atqarýshy organnyń aqshalaı mindettemesi nysanynda usynylady.
Turǵyn úıdi menshikke satyp alý úshin sertıfıkat aldyn ala shart nemese turǵyn úıdi satyp alý-satý sharty bolǵan kezde beriledi", - dep túsindirdi Eńbek mınıstrligi.
Turǵyn úı salý kezinde sertıfıkat QR Jer jáne basqa da zańnamalaryna sáıkes jeke turǵyn úıler salý úshin menshiginde jer ýchaskeleriniń bolýyn eskere otyryp beriledi.
Sertıfıkatty turǵyn úı satyp alý kezinde bastapqy jarnanyń bir bóligi retinde paıdalaný úshin ekinshi deńgeıdegi bankten turǵyn úı qaryzyn berýdi maquldaý týraly hat usyný qajet. Bul rette ekonomıkalyq utqyrlyq sertıfıkaty kelý óńirindegi turaqty turatyn eldi mekende ǵana turǵyn úı satyp alý úshin beriledi.
Esterińizge sala keteıik, qonys aýdarýshylarǵa ekonomıkalyq utqyrlyq sertıfıkatynan basqa, «Qýatty óńirler – el damýynyń draıveri» ulttyq jobasy sheńberinde memlekettik qoldaýdyń mynadaı sharalary usynylady:
1) Kóshýge arnalǵan sýbsıdııa – bir ýaqytta otaǵasyna jáne otbasynyń árbir múshesine 70 AEK mólsherinde;
2) Turǵyn úı jaldaýǵa jáne kommýnaldyq qyzmetterge aqy tóleýge arnalǵan sýbsıdııa – aı saıyn, 12 aı ishinde otbasy músheleriniń sanyna jáne eldi mekenge baılanysty 15-ten 30 AEK-ke deıingi mólsherde;
3) Óńiraralyq qonys aýdarýǵa járdem kórsetetin jumys berýshige keminde 2 jyl merzimmen turaqty jumysqa ornalasý jáne turǵyn úımen qamtamasyz etý shartymen árbir qabyldanǵan qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi;
4) Qysqa merzimdi kásiptik oqytýǵa joldama;
5) Jumysqa ornalasýǵa nemese kásipkerlik bastamany damytýǵa járdemdesý.
