57 jastaǵy SQO turǵyny ómirinde alǵash ret jeke kýálik aldy
PETROPAVL. QazAqparat – Soltústik Qazaqstan oblysynyń probatsııa qyzmetiniń esebinde turǵan sottalǵan 57 jasynda jeke kýálik aldy, dep habarlaıdy QazAqparat tilshisi.
SQO qylmystyq atqarý júıesi departamenti baspasóz qyzmetiniń málimetinshe, 1964 jyly týǵan óńir turǵyny alǵash ret jeke kýáligin aldy.
Ol qazir Qyzyljar aýdanynyń probatsııa qyzmetiniń esebinde tur. Jaza basyp, jańylǵan er adam sottalǵan.
Oǵan qujattardy rásimdeýge probatsııa qyzmeti bóliminiń qyzmetkerleri jáne Qyzyljar aýdany polıtsııa bólimi kóshi-qon qyzmeti kómektesti.
Turǵylyqty jeri boıynsha qujattandyrý jáne tirkeý jumystary júrgizildi, nátıjesinde sottalǵan kópten kútken jeke kýáligin aldy.
«Ómirimde qıyn jaǵdaılar boldy. Qujattarymdy túgendeýge jaǵdaıym kelmedi. Tipti keńestik pasportym da bolǵan emes. Al áskerı bıletimdi joǵaltyp aldym. Jeke kýáligim bolmaǵasyn jumysqa da ornalasa almadym. Endi bul meniń ekinshi týǵan kúnim. Óıtkeni endi jumysqa ornalasýǵa múmkindik bar. Áleýmettik jáne medıtsınalyq kómekterdi alamyn», - deıdi esimin jasyrǵan er adam.
Sottalýshynyń aıtýynsha, onyń týǵan-týystary Reseıge kóship ketken, bul jaqta jalǵyz.
Probatsııa qyzmetiniń qyzmetkerleri halyqty jumyspen qamtý ortalyǵy, jergilikti kásiporyndarmen jasalǵan úsh jaqty memorandým aıasynda ony JShS-niń birine jumysqa ornalastyrdy.
