57 paıyzy ekpe almaǵan: Túrkistan oblysynda qyzylsha juqtyrǵandar sany artqan
TÚRKІSTAN. KAZINFORM – Túrkistan oblysynda jyldyń alǵashqy alty aıynda qyzylshaǵa qatysty 131 kúdikti jaǵdaı tirkelip, onyń 47-si zerthanalyq jolmen rastaldy. Ótken jyldyń osy kezeńinde 27 jaǵdaı anyqtalǵan.
Óńirde qyzylsha jaǵdaılarynyń basym bóligi Saıram aýdanynda – 14, Túrkistan qalasynda – 11, Saýran jáne Túlkibas aýdandarynda 8 jaǵdaıdan tirkeldi.
Oblystyq sanıtarııalyq-epıdemıologııalyq baqylaý departamentiniń málimetinshe, bıyl qyzylshamen aýyrǵandardyń 57,4 paıyzy, ıaǵnı 27 naýqas vaktsına almaǵan. Osyǵan baılanysty óńirde 6-10 aılyq jáne 2-4 jastaǵy 30 myńnan astam balaǵa qosymsha jappaı ımmýndaý júrgizildi.
Sonymen qatar oblysta A vırýsty gepatıtiniń 25 jaǵdaıy tirkelgen. Naýqastardyń 75 paıyzy – mektep oqýshylary. Syrqattanǵandardyń jartysy vaktsınatsııadan ótpegen nemese ekpe kýrsyn tolyq almaǵan.
– A vırýsty gepatıtine qarsy vaktsınatsııa eki jastan bastap júrgiziledi. Bul maqsatqa jergilikti bıýdjetten qarjy bólinip, arnaıy vaktsına satyp alynady. Ókinishke qaraı tirkelgen 25 jaǵdaıdyń 12-sinde naýqastar eki ret vaktsına alǵan. Munda birneshe faktor bolýy múmkin. Mysaly, balaǵa vaktsına durys salynbaýy, vaktsınatsııa týraly málimetterdiń durys berilmeýi nemese preparatty tasymaldaý kezinde tıisti temperatýralyq rejımniń saqtalmaýy yqtımal. Sondyqtan vaktsınatsııa talaptaryn qatań saqtaý qajet, – dedi departament basshysy Nurbek Nyshanov.
Budan bólek óńirde maqsatty toptaǵy turǵyndardy vaktsınatsııamen qamtý kórsetkishi 39,7 paıyz boldy. Bul belgilengen 47,4 paıyzdyq mejege jetpeıdi. Ásirese Saryaǵash, Keles, Túlkibas, Ordabasy, Maqtaaral, Sozaq, Otyrar, Shardara aýdandarynda jáne Arys qalasynda kórsetkish tómen.
Buǵan deıin Túrkistan oblysynda 900-ge jýyq balanyń ata-anasy ekpe salýdan bas tartqanyn habarlaǵan edik.
