57 baǵdar boıynsha júretin 380 qalalyq avtobýs GPS-trekerlermen jaraqtandyryldy
ASTANA. 4 aqpan. QazAqparat - Elorda turǵyndaryna qalalyq avtobýstardyń qozǵalysyn Internet arqyly baqylap otyratyn múmkindik týdy. Barlyq qalalyq avtobýs baǵdarlarynyń qozǵalys baǵyty kórinip otyratyn Astananyń elektrondyq onlaın kartasyn endi http://maps.astana.kz saıtynan baqylap otyrýǵa bolady.
Elordanyń resmı saıtynyń jazýynsha, ótken jyly Astananyń avtobýs parkin GPS-monıtorıng jabdyǵymen jaraqtandyrý jóninde joba júzege asyrylǵan bolatyn. Jańa qurylǵy nátıjesinde atalǵan saıtta kez kelgen avtobýs baǵdaryn onlaın rejıminde baqylaý múmkindigi týdy.
«Búgingi kúni 57 baǵdar boıynsha júretin 380 qalalyq avtobýs GPS-trekerlermen jaraqtandyryldy. Sonymen qatar, elektrondyq kartaǵa qoǵamdyq kóliktiń 1037 aıaldamasy engizildi», - dep habarlaıdy baǵdarlama avtorlary.
Internet-karta avtobýstardyń qozǵalysyn onlaın baqylaýmen qatar:
- uıymdardyń aty, meken-jaıy, telefony, sondaı-aq qyzmet túrleri boıynsha izdeýge (turǵyn úı keshenderiniń, meıramhanalardyń, túngi klýbtardyń, HQO-lardyń, kınoteatrlardyń jáne t.b. ornalasqan jerlerin kórýge bolady);
- qala kóligi aıaldamalaryn, baǵdarlaryn izdeýge, sondaı-aq bastapqy jáne sońǵy núktelerdi kórsetip, yńǵaıly baǵdardy izdeýge;
- kórsetilgen aýmaqtaǵy kez kelgen fragmentti basyp shyǵarýǵa;
- kartaǵa belgi túsirýge jáne betterdi saqtaýǵa;
- jaqyn jerdegi nysandardy izdeýge (mysaly, jaqyn jerdegi bankomatty nemese sulýlyq salonyn izdeýge);
- karta boıynsha araqashyqtyqty nemese aýdandy ólsheýge;
- nysandardy sáıkestendirýge (karta betinde nysanǵa basqanda tańdaǵan nysan týraly aqparatty kórýge bolady. Mysaly, tańdaǵan úıde qandaı uıymdar men kompanııalar baryn kórýge nemese naqty aıaldamaǵa basyp, qandaı avtobýstar toqtaıtynyn bilýge bolady);
- kóshelerdiń kórinisin jáne Astana qalasynyń kórikti jerlerin kórýge;
- qalamyzda ótkiziletin is-sharalar men oqıǵalardy kórýge mynadaı múmkindik beredi:
Astana qalasynyń jospar-kestesi úsh tilde jazylǵan: qazaqsha, oryssha jáne aǵylshynsha. Ázirleýshilerdiń aıtýynsha, kartanyń basqa qyzmetterden artyqshylyǵy jyldam, kórneki jáne túsinikti aqparat berýi. Al eń bastysy - onyń ózektiligi, óıtkeni qalada ózgerister bolyp jatsa, karta aı saıyn jańartylyp otyrady.
