57 almatylyq jańajyldyq mereke kúnderi pırotehnıkadan jaraqattandy
ALMATY. QazAqparat - Jańajyldyq mereke kúnderi Almaty qalasynda pırotehnıkadan 57 adam zardap shekti.
Bul týraly «QazAqparat» HAA tilshisine Almaty qalasy Densaýlyq saqtaý basqarmasynyń bas hırýrgi Nurjan Isabekov habarlady.
«Jańajyldyq mereke kúnderi medıtsınalyq kómek surap, densaýlyq saqtaý mekemelerine 57 adam júgindi. Onyń 25-i Balalarǵa shuǵyl kómek kórsetý ortalyǵyna habarlasqan. 7 adam aýrýhanaǵa jatqyzyldy, onyń 3-eýi bala. Olarǵa qol súıeginiń, bettiń kúııýi, teriniń jyrtylǵan jaraqaty, kóz almasynyń kontýzııasy, bulshyq ettiń soǵylýy dıagnozdary qoıyldy», - dedi bas otashy.
Jaraqattanǵandardyń eń úlkeni 69 jasta, eń jasy - 6-da. Qazirgi ýaqytta olar aýrýhanada.
