Qaıtarylǵan aktıvter: 5,6 mlrd teńge Abaı oblysynda medıtsınalyq nysandardyń qurylysyna jumsalmaq
ASTANA. KAZINFORM — Qazaqstanda zańsyz ıemdenilgen aktıvterdi qaıtarý esebinen áleýmettik nysandar salý jumystary jalǵasyp jatyr. Arnaýly memlekettik qordan Abaı oblysyna densaýlyq saqtaý salasyndaǵy jobalardy júzege asyrýǵa 5,6 mlrd teńge bólindi. Qarajat óńirdegi ınfraqurylymdy jaqsartýǵa jáne medıtsına sapasyn arttyrýǵa baǵyttalmaq. Bul týraly Úkimet málim etti.
Úrjar aýylynda bul qarajat kópsalaly ortalyq aýdandyq aýrýhanaǵa qosymsha korpýs salýǵa jáne zamanaýı medıtsınalyq tehnıkamen jaraqtandyrýǵa jumsalyp otyr.
Aıagóz qalasynda bólingen qarajatqa kópsalaly ortalyq aýdandyq aýrýhanaǵa qosymsha korpýs salynyp jatyr, onda magnıttik-rezonanstyq tomograf ornatylady.
Nysandardy bıyl paıdalanýǵa berý josparlanyp otyr.
Jobalar azamattardy ýaqtyly jáne sapaly medıtsınalyq qyzmettermen qamtý aıasyn keńeıtýge múmkindik bermek.
Buǵan deıin Arnaýly memlekettik qordan Semeı qalasynda 100 oryndyq medıtsınalyq-áleýmettik psıhonevrologııa mekemesin salýǵa 2,6 mlrd teńge bólingen bolatyn.
Esterińizge sala ketsek, «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda Prezıdent Qasym-Jomart Toqaev memleket densaýlyq saqtaý salasyn damytý úshin júıeli túrde kúsh-jiger jumsap kele jatqanyn atap ótken bolatyn. Elimizde medıtsınalyq nysandardyń barlyq spektri – aýyldyq feldsherlik-akýsherlik pýnktterden bastap mamandandyrylǵan aýrýhanalarǵa deıin birtindep jańǵyrtylýda. «Aýylda densaýlyq saqtaýdy jańǵyrtý» ulttyq jobasy aıasynda 540 nysannyń qurylysy salyndy.
Eske sala keteıik, buǵan deıin 5,5 mlrd teńge qaıtarylǵan aktıvter BQO-daǵy aýyldardy sýmen jabdyqtaýǵa baǵyttalǵanyn jazǵan edik.