56 kún: pedagogterdiń eńbek quqyǵy qanshalyqty qorǵalǵan
ASTANA. KAZINFORM – Pedagogter úshin eń mańyzdy áleýmettik kepildikterdiń biri — jyl saıynǵy aqyly eńbek demalysyna shyǵý ýaqytynyń uzaqtyǵyn belgileý. Onyń uzaqtyǵy barlyq pedagog úshin 56 kúntizbelik kúndi quraıdy. Bul týraly QR Oqý-aǵartý mınıstrliginiń baspasóz qyzmetimálim etti.
Vedomstvonyń málimetinshe, pedagogterge jyl saıynǵy aqyly eńbek demalysynyń 2 túri beriledi: negizgi jáne qosymsha.
Qosymsha demalys ekologııalyq qolaısyz jáne radıatsııalyq qaýpi bar aýmaqtarda turatyn pedagogter úshin qarastyrylǵan. Onyń ishinde ekologııalyq qolaısyz aýmaqtarda turatyn pedagogter úshin qosymsha demalystyń uzaqtyǵy 7 kúnnen 12 kúnge deıingi, al radıatsııalyq qaýipti aýmaqtarda turatyn pedagogter úshin 5 kúnnen 14 kúnge deıingi merzimdi quraıdy. Demalys ýaqytyna túsken mereke kúnderi eńbek demalysyna kirmeıdi. Eńbek demalysyn berý kezinde naqty jumys istegen ýaqyt qana esepke alynady.
— Eńbek demalysyn berý kezinde saýyqtyrýǵa arnalǵan járdemaqy laýazymdyq jalaqy mólsherinde tólenedi. Saýyqtyrý járdemaqysynyń mólsherin esepteý pedagogtiń demalys berilgen kúngi naqty júktemesin eskere otyryp, laýazymdyq aqy mólsherinde júrgiziledi, munda qosymsha aqylar men ústemeaqylar eseptelmeıdi. Sondaı-aq, qyzmetkerdiń tolyq emes jumys ýaqyty rejıminde jumys isteýi jyl saıynǵy aqyly eńbek demalysynyń uzaqtyǵyn qysqartýǵa negiz bolmaıdy — demalys tolyq kólemde beriledi», — deıdi Bıýdjettik josparlaý departamenti Eńbekaqy tóleý ádisnamasy basqarmasynyń basshysy Gúlaıym Toqpanova.
Málim bolǵandaı, pedagog qosymsha jumysty nemese ýaqytsha bolmaǵan qyzmetkerdiń mindetterin óziniń negizgi jumysynan bosatylmaı oryndaǵan jaǵdaıda bul laýazymdardy qatar atqara alady. Bul jaǵdaıda saýyqtyrýǵa arnalǵan járdemaqy pedagogke negizgi laýazymy boıynsha ǵana tólenedi. Eger pedagog qosymsha jumysty laýazymdardy qosa atqarý týraly jeke eńbek sharty boıynsha negizgi jumystan bos ýaqytynda atqarsa, saýyqtyrýǵa arnalǵan járdemaqy negizgi jumys úshin de, qosymsha jumys úshin de bólek tólenýi tıis.
QR Oqý-aǵartý mınıstrligi pedagogterdiń eńbek quqyqtaryn qatań saqtaý, jyl saıynǵy eńbek demalysyn ýaqytyly berý jáne tıisti járdemaqylardy tóleý boıynsha mindettemelerdiń ýaqytyly oryndalýy qajettigin nazarǵa salady. Bul talaptardyń oryndalýyna árbir bilim berý uıymy derbes jaýapty ekenin eskertedi.
Aıta keteıik, pedagogter qyzmetiniń tıimdilik reıtıngi engiziledi.