56 aýyl sapaly ınternetpen qamtyldy - Dáýren Abaev
Mınıstrdiń aıtýynsha, memlekettik-jekeshelik áriptestik negizinde aýyldyq eldi mekenderge talshyqty-optıkalyq baılanys jelileri arqyly keń jolaqty ınternet tartyla bastady.
«Máselen, 2018 jyly 144 myńnan astam adamdy qamtıtyn 56 aýyldy eldi meken sapaly ınternetpen qamtyldy. Negizgi maqsat - 1 249 eldi mekendi keń jolaqty jelimen qamtamasyz etý. Jobany júzege asyrý barysynda 20 myń shaqyrym quraıtyn talshyqty-optıkalyq jeli qurylysyn salý josparlanyp otyr», - dedi D.Abaev Úkimettiń búgingi otyrysynda.
Onyń sózine qaraǵanda, «Transeýrazııa sýperaqparattyq magıstral» halyqaralyq jobasy boıynsha Kaspıı teńizi arqyly Qytaı, Ońtústik Shyǵys Azııa jáne Eýropany biriktiretin 15 000 kılometrden astam talshyqty-optıkalyq magıstral salý jumystary jalǵasyp jatyr. Adamı kapıtaldy damytý boıynsha el turǵyndarynyń tsıfrlyq saýattylyǵyn arttyrý sharalary da atqarylyp keledi.
«Jas urpaqtyń shyǵarmashylyq qabiletin damytý maqsatynda 2-11 synyp oqýshylarynyń oqý baǵdarlamalary jańartyldy. Aqtóbe oblysynyń 87 mektebinde jáne Astana qalasyndaǵy 57 mektepte pılottyq baǵdarlamalar iske qosyldy. 2018 jyly halyqtyń bazalyq turǵyda tsıfrlyq sýattylyǵyn arttyrý maqsatynda 700 myńnan astam adam oqytyldy», - dep atap kórsetti mınıstr.
Aıta keteıik, búgingi otyrysta QR Aqparat jáne kommýnıkatsııalar mınıstri Dáýren Abaev «Tsıfrlyq Qazaqstan» baǵdarlamasyn iske asyrýdyń nátıjesi boıynsha esep berdi. Búgingi tańda elimizde elektrondy saýdanyń kólemi artyp keledi.
Osy oraıda Úkimet basshysy Baqytjan Saǵyntaev tsıfrlandyrý aıasynda memlekettik organdardyń ózara baılanysyn kúsheıtip, aqparattyq texnologııalardy qoldanýdy talap etetin normalardy tezdetip bitirýdi tapsyrdy.