553 mln teńge bólindi: Memleket 80 myń adamdy tegin skrınıngpen qamtıdy

ASTANA. KAZINFORM — Sozylmaly jáne qaterli aýrýlar elimizde jáne álemde ólim-jitimniń negizgi sebepteriniń biri bolyp otyr. Aýrýdy erte kezeńinde anyqtaý ony emdeýdi jeńildetip, tıimdiligin arttyrady.

Osy maqsatta Qazaqstanda ulttyq skrınıngtik baǵdarlamalar júzege asyrylyp keledi. Bul týraly Astana qalasy boıynsha Áleýmettik medıtsınalyq saqtandyrý qory fılıalynyń dırektory Gúljan Shaıhybekova málimdedi.

Gúljan Shaıhybekovanyń aıtýynsha, búginde elimizde birneshe baǵyt boıynsha tegin skrınıng júrgiziledi.

— Birinshiden, arterııalyq gıpertenzııa, júrektiń ıshemııalyq aýrýy, qant dıabeti, glaýkoma jáne minez-qulyqqa baılanysty qaýip faktorlaryna 40 pen 76 jas aralyǵyndaǵy erler men áıelder eki jylda bir ret tekserýden ótedi. Ekinshiden, sút bezi qaterli isigi boıynsha 40 pen 76 jas aralyǵyndaǵy áıelder eki jylda bir ret mammografııa jasatady. Qajet bolǵan jaǵdaıda ýltradybystyq zertteý nemese bıopsııa ótkiziledi. Úshinshiden, jatyr moıny qaterli isigine qarsy 30 ben 74 jas aralyǵyndaǵy áıelder tórt jylda bir ret tsıtologııalyq test tapsyrady, qajet bolsa, vıdeokolposkopııa jasalady. Áıelder bul tekserýlerden mindetti túrde ótýi kerek. Barlyq sharalar qaterli isikti erte satysynda anyqtap, der kezinde em júrgizý úshin jasalady. Tórtinshiden, ishek qaterli isik boıynsha 50 men 76 jas aralyǵyndaǵy erler men áıelder eki jylda bir ret, qajet bolǵan jaǵdaıda vıdeokolonoskopııadan ótedi, — dedi Gúljan Shaıhybekova.

Sonymen qatar ol onkologııalyq skrınıng qyzmetteri jańa zańǵa sáıkes tegin medıtsınalyq kómektiń kepildendirilgen kólemi paketine engizilgenin atap ótti.

— Onkologııalyq skrınıngter mindetti áleýmettik medıtsınalyq saqtandyrý júıesinen alynyp, tegin medıtsınalyq kómektiń kepildendirilgen kólemine engizildi. Memleket esebinen bul maqsatqa 553 mıllıon teńge bólindi. Bul baǵdarlama 80 myńnan astam azamatty qamtıdy. Barlyq tekserýler tegin jáne josparly túrde júrgiziledi. Bul degenimiz — saqtandyrý mártebesine qaramastan árbir azamat óz emhanasynda skrınıngten óte alady, — dep qorytyndylady ol.

Buǵan deıin elimizde jyl saıyn 600-ge jýyq bala onkologııalyq aýrýǵa shaldyǵatynyn jazǵanbyz.