553 myńnan astam qazaqstandyq Skills Enbek platformasy arqyly bilim aldy

ASTANA. KAZINFORM – Jyl basynan beri 553,7 myń azamat, onyń ishinde 53,5 myńǵa jýyq jumyssyz Skills Enbek kásiptik oqytý platformasynda onlaın-kýrstardan ótkeni týraly sertıfıkat aldy. Platformada barlyǵy 1 mln-nan astam qazaqstandyq tirkelgen, onyń 710,3 myńy – 2025 jyly tirkeldi. Bul rette platforma jumysynyń barlyq kezeńinde 960 myń adam oqýdan ótti.

Oqýdy aıaqtaǵan 53,5 myń jumyssyz azamattyń shamamen 16,5 myńǵa jýyǵy negizinen Túrkistan oblysy (3,5 myń adam), Qyzylorda jáne Qostanaı oblystary (tıisinshe 2,5 jáne 2,8 myń adam), Almaty q. (2,3 myń adam), Almaty oblysy (2,2 myń adam) jastar (16-35 jas aralyǵy) boldy.

Platforma iske qosylǵannan bastap avtorlar ártúrli baǵyttar boıynsha 1 000-nan astam kýrs jarııalady, onyń 375-i – tegin. Sondaı-aq odan ári oqý úshin bilim berý alańdaryna aýysý múmkindigimen Courstore, Fluent Education jáne ıAndeks Qazaqstan seriktesteriniń kýrstary bar.

Kýrstardyń uzaqtyǵy 6-dan 72 saǵatqa deıin.

Qyrkúıek aıyndaǵy eń tanymal kýrstar: «IT ı telekommýnıkatsıı», «Povar-kondıter», «Seniń mansaptyq bastamań: «Elektrondyq eńbek bırjasyn» qalaı paıdalanýǵa bolady», «Ýpravlenıe personalom», «Pishý jáne tigý».

Platformada áleýmettik qyzmet kórsetý jáne t.b. salalardaǵy túrli mamandyq boıynsha tegin kýrstar sany únemi artyp keledi. Osylaısha, Jumysshy mamandyqtar jylynyń júzege asyrylýy aıasynda aǵymdaǵy jyldyń mamyr aıynda mektep túlekteri men TjKB oqýshylary úshin «Seniń mansaptyq bastamań: «Elektrondyq eńbek bırjasyn» qalaı paıdalanýǵa bolady» jáne «Tvoı karernyı start: kak ıspolzovat «Elektronnýıý bırjý trýda»» atty kýrstar ornalastyryldy.

Atalǵan arnaıy kýrstar bolashaq mamandyqty tańdaýǵa járdemdesedi, jumys izdeý men ózindik tanystyrý daǵdylaryn qalyptastyrady, sondaı-aq Elektrondyq eńbek bırjasynyń quraldaryn tıimdi qoldanyp, jumys vakansııalaryn tabý, biliktilikti arttyrý jáne t.b. múmkindikterdi úıretedi. Búgingi tańda 375 myńnan astam mektep oqýshysy men stýdent atalǵan oqytýdan ótip, tıisti sertıfıkattarǵa ıe boldy.

Budan buryn habarlaǵandaı, platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa jáne «ómir boıy oqytý» tujyrymdamasyn ilgeriletýge baǵyttalǵan. Ol marketpleıs – qyzmetter naryǵy qaǵıdaty boıynsha onlaın kýrstarǵa qol jetkizýdi usynatyn halyqaralyq oqytý alańdaryna uqsas qurylǵan.

Oqýǵa https://skills.enbek.kz/ siltemesi arqyly nemese Elektrondyq eńbek bırjasynda (Enbek.kz) «Onlaın oqytý» bólimin tańdaý arqyly qol jetkizýge bolady.

Platformada bilim alýshy oqytýdyń qolaıly qarqyny men tilin, materıaldy berýdiń yńǵaıly prıntsıpin derbes tańdaıdy, bilim berý úderisindegi óziniń ilgerileýin baqylaı alady.

Bilim alýshy úshin artyqshylyqtar: keńeıtilgen kýrstardy izdeý, sabaqtyń túsinikti qurylymy, oqý protsesin baqylaý jáne kýrs avtorlarymen jyldam ózara árekettesý. Paıdalanýshylar úshin jasandy ıntellekt kómegimen chat-bot qol jetimdi, ol jyldam izdeýdi jáne qyzyǵýshylyq týdyratyn suraqtarǵa jaýap alýdy qamtamasyz etedi.

Oqý aıaqtalǵannan keıin bilim alýshy 70% shekti deńgeımen testileý tapsyrýǵa tıis. Onlaın kýrsty sátti aıaqtaǵan jaǵdaıda daǵdylardy ıgerý týraly sertıfıkat beriledi. Kýrsty aıaqtaýdyń mindetti sharty – bilim alýshy tarapynan kýrsty baǵalaý. Sertıfıkatty júkteý kezinde ıgergen daǵdylar boıynsha Enbek.kz-te bos jumys oryndarynyń usynystary qosyldy.

Alynǵan sertıfıkat Enbek.kz-te tirkelgen kezde bilim alýshy jasaǵan túıindemede avtomatty túrde kórsetiledi. Qyzmetkerlerdi izdeý kezinde áleýetti jumys berýshi Platformada sátti oqýdan keıin alynǵan sertıfıkattardy kóre alady.

Avtorlar men ázirleýshilerge arnalǵan platformada onlaın kýrstardy ornalastyrý tegin. Kýrstar memlekettik, orys jáne aǵylshyn tilderinde ornalastyrylýy múmkin, aqparat berýdiń ártúrli formattary: mátin, prezentatsııa, beıne jáne aýdıo materıaldar, ınfografıka jáne basqa túrleri bolýǵa tıis. Platforma erekshe qajettilikteri bar bilim alýshylar úshin ınterfeısti beıimdeý múmkindigin boljaıdy.

Kýrs avtorlary úshin yńǵaıly sabaq qurastyrýshy, jarııalanǵan kýrstardyń statıstıkasy men tıimdiligin qaraýǵa qoljetimdi, sertıfıkattardyń ártúrli dızaıny kózdelgen, sondaı-aq oqý qunyn aldyn ala esepteýge arnalǵan onlaın-kalkýlıator bar.

2023 jyldyń jeltoqsan aıynan bastap kýrstardy Enbek mobıldi qosymshasy arqyly oqýǵa bolady.

Buǵan deıin Qazaqstannyń e-Qyzmet júıesi halyqaralyq OPSI platformasynda tanystyrylǵanyn jazǵanbyz.