553 aýyldyń ákimdiginde tsıfrlyq qyzmet ortalyqtary ashylady
Bul týraly Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek Aqmola oblysyna jasaǵa saparynda aıtty. Mınıstrlik ókili atalmysh oblystaǵy Andreevka aýylynyń ákimdiginde ashylǵan birinshi bekettiń jumysymen tanysqan bolatyn.
«Tsıfrlyq damý, ınnovatsııalar jáne aeroǵarysh ónerkásibi mınıstrligi «Qazaqtelekom» AQ-men birge memlekettik-jekeshilik áriptestik sheńberinde aýyldyq eldi mekenderde eQoldau jalpyǵa qoljetimdi pýnktteriniń jelisin qurdy. Olardyń kómegimen turǵyndar memlekettik qyzmetterdi jeńil ári tez alyp, elektrondy saýda alańdarynda tehnıka men túrli taýarlardy, sondaı-aq temirjol jáne avıabıletterdi satyp alady. Kommýnaldyq qyzmetterge onlaın-tólem jasaý, dárigerdiń qabyldaýyna jazylý, telemedıtsına servısterine qol jetkizý, poshta jáne kýrerlik qyzmetke tapsyrys berý, eQoldau arqyly Wi-Fi sıgnalyn alý sııaqty elektrondy servısterdiń ıgiligin kóredi», - deıdi vıtse-mınıstr.
Ashat Orazbek osy sııaqty ózine-ózi qyzmet kórsetý termınaldary búkil el boıynsha 553 aýyldyq ákimdikte ornatylatynyn atady.
«Bul jobany qala men aýyl arasyndaǵy tsıfrlyq teńsizdikti joıýdyń taǵy bir qadamy dep sanaýǵa bolady. Burynǵydaı aýdandyq halyqqa qyzmet kórsetý ortalyqtaryna barýdyń qajeti joq. Byltyr elimiz boıynsha 1250 talshyqty-optıkalyq baılanys jelisi ornatyldy. Andreevka aýyly – osyndaı qurylǵyny ornatylǵan alǵashqy aýyl. eQoldau ashyq qoljetimdilik pýnktteri arqyly aýyl turǵyndary elektrondyq tsıfrlyq qoltańbalardy alyp, «Azamattarǵa arnalǵan úkimet» memlekettik korporatsııasy Egov.kz portalyn, Enpf.kz biryńǵaı zeınetaqy qorynyń saıtynyń barlyq múmkindikterin paıdalana alady. Jalpy jańa bólimder men qyzmetterdi qosý arqyly seriktestik ekojúıesin damytý josparlanýda», - dedi mınıstrdiń orynbasary.
Shara barysynda Tsıfrlyq damý, ınnovatsııalar jáne aeroǵarysh ónerkásibi mınıstrligi men «Qazaqtelekom» arasynda ózge de aýyl ákimdikterin qoǵamdyq qol jetkizý pýnktterimen jabdyqtaý boıynsha yntymaqtastyq týraly memorandýmǵa qol qoıyldy.