55 jyldan keıingi tazartý: Astana sý qoımasynyń syıymdylyǵy 47 mln tekshe metrge artady
ASTANA. KAZINFORM – Prezıdent tapsyrmasymen Astana sý qoımasy 55 jyldan keıin alǵash ret tazartylyp jatyr. Nátıjesinde sý qoımasynyń syıymdylyǵy 47 mln tekshe metrge artady. Bul týraly Jibek Joly telearnasyndaǵy «Taza qala» baǵdarlamasynda aıtyldy.
QR Sý resýrstry jáne ırrıgatsııa mınıstrligi Gıdrotehnıkalyq ımarattar basqarmasynyń bas sarapshysy Sergeı Dobrynınniń aıtýynsha, bul jumystar 13 jyl boıy jazǵy jáne kúzgi kezeńderde jalǵasady.
− Bıyl qazan aıynyń sońyna deıin Astana sý qoımasynan 50 myń tonna laı shyǵarý josparlanǵan. Laı shyǵarylǵan soń, qoımanyń jobalyq kólemi 47 mln tekshe metrge ulǵaıady. Bul jumystar úshin «Qazsýshar» fılıaly arnaıy eki tehnıkamen qamtylǵan. Ol tehnıkany qoldaný úshin «Qazsýshar» mamandary arnaıy daıyndyqtan ótken, − deıdi QR Sý resýrstry jáne ırrıgatsııa mınıstrligi Gıdrotehnıkalyq ımarattar basqarmasynyń bas sarapshysy Sergeı Dobrynın.
Aıta keteıik, 1970 jyly salynǵan Astana sý qoımasyna osy ýaqytqa deıin tazartý jumysy júrgizilmegen. Ol elordamyzdy aýyz sýmen qatamasyz etetin jalǵyz sý qoımasy. Qoımanyń jalpy kólemi – 410,9 mln tekshe metr.
Al 2030 jyly Astana halqy 2 mln-ǵa jetken jaǵdaıda 150 mln tekshe metr sý qajet bolady.
Mamandar klımattyq jaǵdaıǵa baılanysty, balyqtyń ýyldyryq shashý kezeńin eskere otyryp, tazartý protsesi keminde 10 jylǵa sozylýy múmkin dep boljaıdy. Sebebi 1 jylda 5 aıdaı ǵana jumys isteýge múmkindik bolady.
Eske sala ketsek, «Taza qala» telejobasy ekinshi maýsymymen qaıta oraldy. Bul joly túsirilim toby monoqalalarǵa basa nazar aýdaryp, elimizdiń túkpir-túkpirindegi ekologııalyq ahýaldy tereńirek taldamaq. Sondaı-aq elimizdiń úsh megapolısi — Astana, Almaty men Shymkent nazarǵa iligedi. Telejoba aptasyna 2 ret – dúısenbi jáne sársenbi kúnderi saǵat 19:30-da kórermen nazaryna usynylmaq.
Sondaı-aq, elordada «Green ID» jobasy qolǵa alynyp, jasyl jelekterdi tsıfrlyq pasporttaý jumysy júrgizilip jatyr. Osylısha, saıabaqtardaǵy árbir aǵash týraly egjeı-tegjeıli aqparat alýǵa bolady.