55 jastaǵy Oral turǵyny 430 shaqyrymdy velosıpedpen júrip ótti
ORAL. QazAqparat - Oral qalasynda turatyn Amantaı Esenǵalıev 430 shaqyrymnan astam qashyqtyqty velosıpedpen júrip ótti, dep habarlaıdy QazAqparat tilshisi.
Ol týǵan jeri - Jánibek aýdany Kúıgenkól aýylyna deıin velosıpedpen bardy.
Óziniń aıtýynsha, mundaı alys qashyqtyqqa alǵash ret shyqqan eken. 55 jastaǵy azamat 5 shildede tańǵy saǵat 5-te qos aıaqty «tulparyna» otyryp, sol kúni túnde jolshybaı Aqjaıyq aýdany Qabyrshaqty (Pervomaı) aýylyna qarasty sharýa qojalyǵyna túnep shyǵady. Kelesi kúnderi túnde Qaztalov aýdanyna qarasty Jalpaqtal, sodan keıin Qaztalov aýyldaryna aıaldap, Kúıgenkólge keshe saǵat 16.00-der shamasynda jetken. Ony aýyl ákimi Álııa Ospanova, synyp jetekshisi Jemis Bısenova bastaǵan turǵyndar kútip aldy.
«Búgin aýyl aktıvimen birge dóńgelek ústel otyrysyn ótkizip jatyrmyz. Bul sapar - týǵan jerge degen qurmet, turǵyndardyń sportpen dendep aınalysýyna septesetin, salamatty ómir saltyn ornyqtyrýda úlgi bolarlyq oqıǵa. Aldaǵy ýaqytta da túlekterdiń týǵan aýylymen baılanysyn nyǵaıtý baǵytynda jumystanatyn bolamyz», dedi QazAqparat tilshisine Álııa Bolatqyzy.
Aıta keteıik, Amantaı Esenǵalıev BQO qylmystyq-atqarý júıesi departamentinde jumysshy bolyp jasaıdy. Ul-qyzdary eseıgen, ár salada qyzmet etip júr.
