55 jastaǵy Kamı Rıta Everest taýyn 31-shi ret baǵyndyrdy

ASTANA. KAZINFORM — Nepaldyq sherpa Kamı Rıta 27 mamyrda Everest taýynyń shyńyna 31-shi ret shyqty. Bul — álemdegi eń kóp ret Everestke shyqqan adamnyń rekordy, dep jazdy Reuters agenttigi.

Kamı Rıta 55 jasta. Ol Nepaldyń Solýhýmbý aýdanyndaǵy Tame aýylynda ómirge kelgen. 1992 jyldan beri alpınıstik gıd bolyp keledi ári 1994 jyldan bastap Everest shyńyna shyqqan. 

Osy ýaqyt aralyǵynda ol tek úsh jyl ǵana taýǵa shyqpaǵan eken. Bıyl Kamı Rıta quzar bıikke tańǵy 4:00-te kóterilip, Everesttiń 8 848,86 metr bıiktigine jetken. Alpınıst 22 adamnan turatyn Úndi armııasynyń ekspedıtsııasyn jáne 27 sherpa tobyn basqarǵan. Kamı Rıta bul jetistikpen ózine tán álemdik rekordty jańartty.

Burynǵy rekord ıeleri qatarynda pasang Dava sherpa bar, ol Everestke 29 ret shyqqan. Sondaı-aq, brıtandyq alpınıst Kenton Kýl — sherpa emes alpınıster arasynda rekord ıesi, ol 19 ret shyńǵa shyqqan. 2025 jylǵy kóterilý maýsymynda Nepal úkimeti 468 adamǵa Everestke kóterilý ruqsatyn bergen. Bul maýsymda 300-den astam adam shyńǵa jetkenimen, ókinishke qaraı, eki adam qaıtys bolǵan. Kamı Rıta áleýmettik jelilerde óziniń ekspedıtsııalary týraly jıi aqparat taratady. 

Ol Everestke shyǵar aldynda ótkiziletin dástúrli pýdja rásiminen fotosýretter men vıdeolar jarııalaıdy. Bul rekord Kamı Rıtanyń jáne Nepaldyq sherpalardyń álemdik alpınızm tarıhyndaǵy úlken jetistigi bolyp sanalady. Ol Nepaldyń alpınıstik dástúrin jáne mádenıetin búkil álemge tanytyp otyr.

Eske sala keteıik, buǵan deıin Everest shyńyn baǵyndyrǵan qazaq qyzy endi qaı taýǵa tý tigetinin jazǵan edik.