55 myń qostanaılyqqa tumaýǵa qarsy vaktsına tegin egiledi
QOSTANAI. QazAqparat - Qostanaı oblysynda tumaýdyń aldyn alý maqsatynda vaktsına egý sharalary bastaldy, dep habarlaıdy QazAqparat tilshisi.
Qostanaı oblysyna Reseıde shyǵarylatyn «Grıppol» ekpesiniń 55 myń danasy satyp alynǵan. Búginde 37 myń adam tegin ekpe qabyldady. Bul týraly QR Densaýlyq saqtaý mınıstrligi Qoǵamdyq densaýlyq saqtaý komıtetiniń oblys fılıalynyń mamany Olga Býgaıko málim etti.
Vaktsına halyqaralyq standartan ótken.
«Bir eskeretini, ekpe egilgennen keıin 14 kúnnen soń kúshine enedi, onyń qorǵanysh belsendiligi 6-dan 12 aıǵa deıin sozylady. Jalpy, qazirgi kúni Qostanaı óńirinde tumaý boıynsha epıdemıologııalyq jaǵdaı turaqty», - dedi maman.
Tegin ekpe egý jumystary barlyq azamattarǵa jasalmaıdy. Memlekettik bıýdjet qarajatyna juqpaly aýrýlarǵa shaldyǵý qaýpi eń kóp áleýmettik toptar - sozylmaly ókpe, júrek-qan tamyrlary aýrýlarymen aýyratyn, ımmýnıteti tómen jáne jıi aýyratyn balalar, medıtsına qyzmetkerleri men júkti áıelderge tegin egiledi.
Tumaýǵa qarsy vaktsınany aqyly túrde alýǵa bolady. Máselen, Qostanaı qalasynda «Márııam», «Medservıs plıýs» jeke medortalyqtary men emhanalardyń ekpe bólmelerine júgine alasyz. Jalpy, 1 jeltoqsanǵa deıin halyq kóp shoǵyrlanǵan eldi mekenderdiń turǵyndaryna ekpe egý josparlanǵan.
