55 myń eksponaty bar Qyzylorda oblystyq tarıhı-ólketaný murajaıy qaıta jańǵyrtyldy (FOTO)
QYZYLORDA. QazAqparat - Búgin qaıta jańǵyrtýdan ótkizilgen oblystyq tarıhı-ólketaný mýzeıiniń jańa ekspozıtsııasynyń ashylý rásimi ótti. Sharaǵa aımaq basshysy, jergilikti qylqalam jáne qolóner sheberleri, zııaly qaýym ókilderi qatysty.
Syr óńirindegi qýanyshqa sýretshi, Qazaqstannyń eńbek sińirgen óner qaıratkeri Aǵymsaly Dúzelhanov arnaıy kelip, jınalǵan qaýymdy quttyqtap, óziniń kartınasyn syıǵa tartty, dep habarlaıdy oblystyq ákimdiktiń baspasóz qyzmeti.
«Internettiń zamanynda mýzeıdi tek qana kóneniń qoımasy dep qaraýǵa bolmaıdy. Murajaı - óskeleń urpaqtyń tarıhı sanasyn qalyptastyrady. Halqymyzdyń úkili úmiti men asyl armanyn iske asyratyn urpaq tarıhyn bilýi tıis. Jańarǵan murajaı qutty bolsyn. Ujymnyń jumysyna tabys tileımin», - dedi oblys ákimi Qyrymbek Kósherbaev.
Ǵasyrlar synynan ótip, ýaqyt pen bolmys qalyptastyrǵan ulttyq dástúrimiz, babalar mańdaı teri, atalar qol eńbegi, analarymyzdyń kóz maıy sińgen dúnıeler, kóneniń kózi, kóńil tolqytatyn jádigerler kıeli ólkemizdiń mádenıet pen rýhanııat ordasy 80 jylǵa jýyq tarıhy bar oblystyq tarıhı-ólketaný mýzeıi arqyly urpaqtan urpaqqa jetip otyr.
«Dara» fırmasynyń júrgizgen reekspozıtsııalyq jumystarynyń nátıjesinde mýzeı zaldary zamanaýı úlgide jasaqtalyp, jańartyldy. Mýzeıdiń I jáne II qabattaryna jańa tehnologııalyq elektrondy monıtorlar men teledıdarlar ornatyldy. Kire beriste mýzeı zaldarynyń vırtýaldy ekspozıtsııasymen tanysýǵa bolady.
Mine, osyndaı tól tarıhymyz ben ulttyq ıdeologııamyzdy nasıhattaıtyn rýhanı-mádenı ortalyqtyń qorynda qazirgi tańda 55 416 eksponat saqtaýly. Ólkeniń tarıhyn, tabıǵatyn, mádenıeti men salt-dástúrin, aýylsharýashylyǵyn jáne Táýelsiz Qazaqstannyń qalyptasý jyldaryndaǵy mańyzdy oqıǵalaryn baıandaıtyn 11 zalda 4 502 jádiger tur.
Mádenı tegimizdi tanytatyn tól muralar, shashaýy shyqpaı jetken jaýHarly jádigerler saqtalǵan mýzeıdiń jańarǵan ekspozıtsııasy Alashtyń asqaq rýhyn baıandap, Syr eliniń tarıh taǵylymyn keıingi jas urpaqqa tanyta beretini sózsiz.
Avtor: Elýbaı Áýezov.
