5,5 myń jas qazaqstandyq «Naýryz» jáne «Otaý» baǵdarlamasy arqyly baspanaly boldy

ASTANA. KAZINFORM — Premer-mınıstrdiń orynbasary Ermek Kósherbaevtyń málimdeýinshe, bıyl «Naýryz» jáne «Otaý» turǵyn úı baǵdarlamasyna bıýdjetten 220 mlrd teńge bólindi. 

— Jastardy qoldaý boıynsha keshendi shara júzege asyrylyp jatyr. Basty másele — jastardy turǵyn úımen qamtamasyz etý. Bıyl «Naýryz» jáne «Otaý» turǵyn úı baǵdarlamasyna bıýdjetten 220 mlrd teńge bólindi. Nátıjesinde 5,5 myń jas baspanaly boldy, — dedi Ermek Kósherbaev Úkimet úıinde ótken baspasóz máslıhatynda.

Sondaı-aq vıtse-premer bıyl jumysshy jastardy qoldaýǵa baǵyttalǵan «Naýryz jumysker» turǵyn úı baǵdarlamasy iske qosylǵanyn tilge tıek etti.

— Odan bólek, aýyldyq jerler men shaǵyn qalalarda suranysqa ıe mamandarǵa arnalǵan óńirlik ıpotekalyq baǵdarlama da júzege asyrylyp jatyr, — deıdi ol.

Aıta ketsek, 15 shildede Prezıdent kóppáterli turǵyn úılerdi basqarý júıesin jetildirýge baǵyttalǵan qujatqa qol qoıdy. 

Sonymen qatar 15 shilde kúni Memleket basshysy turǵyn úı-kommýnaldyq sharýashylyq máselesi týraly zańǵa ózgeris engizdi.