55 000 biregeı kody bar AHJ-11 qazaq tilindegi nusqasy bizge ne beredi

ASTANA. KAZINFORM – Alǵash ret memlekettik tilde 11-shi qaıta qaralǵan aýrýlardyń halyqaralyq jiktemesi usynyldy. 

Dúnıejúzilik densaýlyq saqtaý uıymy resmı túrde qazaq tilindegi nusqasyn qamtıtyn 11-shi qaıta qaralǵan aýrýlardyń halyqaralyq jiktemesiniń jańartylǵan nusqasyn usyndy. 

Bul medıtsınalyq derekterdiń dáldigin, egjeı-tegjeıin jáne úılesimdiligin arttyrýǵa yqpal etetin Qazaqstannyń densaýlyq saqtaý júıesin damytýdaǵy mańyzdy qadam. Qazirgi ýaqytta álemniń 132 eli AHJ-11 engizý boıynsha jumys istep jatyr, bul rette qazaq tili AHJ-11 resmı aýdarylǵan 11-shi tilge aınaldy. Buǵan deıin aǵylshyn, ıspan, orys, ózbek jáne basqa da birneshe tilderdegi nusqalary shyqqan. 

AHJ-11 aýrýlar men densaýlyqqa qatysty máselelerdi jikteý men kodtaýdyń jahandyq standartyn bildiredi. Qujatta jaraqattardyń, aýrýlardyń jáne ólim sebepteriniń shamamen 55 000 biregeı kody bar. Ol medıtsınalyq qujattamany júrgizýdi standarttaýǵa, aýrýlardyń naqty esebin qamtamasyz etýge jáne ulttyq jáne halyqaralyq deńgeıde derektermen almasýdy jeńildetýge múmkindik beredi. 

- AHJ-11 qazaq tilindegi nusqasy statıstıka men syrqattanýshylyqty taldaý protsesin jaqsartýǵa, epıdemıologııalyq aqparatty jınaýǵa jáne esepke alýǵa múmkindik beredi, bastapqy býyndaǵy medıtsınalyq-sanıtarııalyq kómekti jaqsartýǵa yqpal etedi, profılaktıka jáne emdeý máselelerin sapaly retteýge járdemdesedi, medıtsınalyq derekterdi elde jáne shetelde birdeı túsindirýge múmkindik beredi, - dep atap ótti Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Gúlnar Sársembaeva.

Dúnıejúzilik densaýlyq saqtaý assambleıasynda AHJ-11 maquldaǵannan keıin, 2019 jyldyń mamyrynda DDU-ǵa múshe elderdiń aldyńǵy nusqadan (AHJ-10) kezeń-kezeńimen kóshý protsesin bastady. Qazaqstanda qazaq tiline aýdarý jobasy 2023 jyly Salıdat Qaıyrbekova atyndaǵy ulttyq ǵylymı densaýlyq saqtaýdy damytý ortalyǵy men medıtsına ýnıversıtetteriniń belsendi qatysýymen Densaýlyq saqtaý mınıstrliginiń bastamasymen bastaldy. Bul úderiste DDU sarapshylary tehnıkalyq qoldaý kórsetti.

- Qazaq tilin AHJ-11-ge qosý - Qazaqstan úshin mańyzdy qadam. Bul medıtsına qyzmetkerleriniń jumysyn jeńildetip qana qoımaı, medıtsınalyq qujattama men statıstıkalyq málimetterdiń sapasyn arttyrady. Bul densaýlyq jaǵdaıyn taldaýǵa jáne densaýlyq saqtaý júıesin damytýdy strategııalyq josparlaýǵa kómektesetinine senimdimin, - dep atap ótti DDU-nyń Qazaqstan Respýblıkasyndaǵy ókili doktor Skender Syla.

AHJ-11 týraly qosymsha aqparatty DDU-nyń resmı paraǵynan tabýǵa bolady

Dos Sarbasov bastaǵan qazaqstandyq ǵalymdardyń onkologııaǵa qarsy dárisin óndiristik deńgeıge shyǵarý úshin qansha aqsha ketýi múmkin ekenin aıtqan edi.