Tabysyn 53,3 mlrd teńgege jasyrǵan blogerler anyqtaldy — komıtet

ASTANA. KAZINFORM — Memlekettik kirister komıteti tabysyn tómen kórsetken blogerlerge habarlama jibere bastady.

— Túrli aqparat kózderinen alynǵan derekterde usynylǵan salyq deklaratsııalarynyń málimetterimen salystyrý qorytyndysy boıynsha 594 tulǵanyń tabysynda 53,3 mlrd teńgege sáıkessizdik anyqtaldy. Olarǵa 13-14 aqpan aralyǵynda «kiristi tómendetý» zań buzýshylyǵy boıynsha kameraldyq baqylaý habarlamalary jiberildi, — delingen komıtettiń buqaralyq aqparat quraldaryna taratqan aqparatynda.

Osy oraıda memlekettik kiris organdary salyq mindettemelerin tolyq oryndaý maqsatynda blogerler men jeke tulǵalarǵa salyqtyq ákimshilendirýdi turaqty negizde júrgiziletinin habarlap otyr. 

— Baqylaý sharalaryn júrgizý kezinde memlekettik kiris organdary ýákiletti memlekettik organdarmen, uıymdarmen jáne ózge de tulǵalarmen ózara jumys isteıdi. Habarlamany oryndaý maqsatynda derbes eseptelgen salyqtardy tóleı otyryp, qosymsha salyq esebin tapsyrady, al habarlamamen kelispegen jaǵdaıda sebebin túsindirý qajet, — deıdi kirister komıtetinen.

Osylaısha tabysyn jasyrǵan blogerlerge salyq máselesin sheshýge 30 kún berildi. 

— Tabys alý kezinde salyqtardy tóleý qajettiligine, onyń ishinde ártúrli ınternet-resýrstarynda onlaın-jarnamalardy jarııalaýǵa (úıretý, satý, ártúrli oqytý kýrstaryn satý, utys oıyndaryn ótkizý jáne t. b.) nazar aýdaramyz. Atalǵan mindettemeler Qazaqstan Respýblıkasynyń Konstıtýtsııasynda jáne Salyq kodeksinde belgilengen, — dep tolyqtyrylǵan habarlama. 

Eske sala ketsek, byltyr toǵyz aıda blogerler 1,2 mlrd teńge salyq tóledi. 

Sondaı-aq kirister komıteti blogerler tólegen salyq qalaı baqylanatynyn túsindirgen edi.