530 myń bala kezekshi synypta bilim alady

NUR-SULTAN. QazAqparat - 1 qyrkúıekten bastap bastaýysh synypta bilim alatyn 530 myń bala kezekshi synypta oqıtyn boldy. Bul týraly Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Birneshe kúnnen keıin jańa oqý jyly bastalady. Búgingi kúni daıyndyq jumystary qarqyndy júrip jatyr. 1 qyrkúıek - ádettegideı Bilim kúni. 1 qyrkúıekten bastap jańa oqý jyly bastalady. Ózderińiz biletindeı, oqý jyly indetke baılanysty qashyqtan oqytý formatynda júrgiziledi. Bul týraly shildede Úkimet otyrysynda sheshim qabyldanǵan edi. Árıne, biz úshin eń bastysy - balalardyń jáne ustazdarymyzdyń densaýlyǵy, qaýipsizdigi», - dedi ol.

Osy rette mınıstr qashyqtan oqytýdyń eki ereksheligine toqtaldy.

«Birinshisi - kezekshi synyptardyń jumysy. 1-4 synyptarǵa baılanysty kezekshi synyptardyń jumysy ata-analardyń derbes sheshimi, ótinishteri bolsa uıymdastyrylady. Ekinshi erekshelik - bul shalǵaıdaǵy aýyldardaǵy shaǵyn jınaqtalǵan mektepter. Eger osy aýyldarda epıdemıologııalyq ahýal jaqsy bolatyn bolsa, onda bul bilim ordalary dástúrli formatta jumys isteıtin bolady. Sondaı múmkindik berip otyrmyz»,- dedi mınıstr.

Onyń dereginshe, oqýshylardyń 80 paıyzy nemese 2,6 mln bala qashyqtan bilim alady. Bastaýysh synyp oqýshylarynyń 15 paıyzy nemese 530 myń balanyń ata-analary kezekshi synypta oqytýǵa ótinish bergen.

«Qalǵan 5 paıyz balalar shaǵyn jınaqty dástúrli formatta oqıtyn bolady. Olardyń sany - 202 myń bala. Mine osyndaı formatta jumysymyzdy bastaımyz», - dedi Ashat Aımaǵambetov.