53 qalada káriz júıesin jańartýǵa jarty trıllıon teńgeden astam qarjy kerek

NUR-SULTAN. QazAqparat – Eldegi 53 qalanyń kárizdik-tazartý júıesin jetildirýge 516 mlrd teńge kerek. QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev Úkimet otyrysynda osyndaı jospardy ortaǵa saldy, dep habarlaıdy QazAqparat tilshisi.

«Eskirgen kárizdik–tazartý qurylystarynan lastaýshy zattar shyǵaryndylaryn azaıtý úshin mınıstrlik elimizdiń 53 qalasynda kárizdik-tazartý qurylysyn salý jáne jańartý jobalaryn qolǵa aldy.

Osy 53 jobanyń barlyǵyn iske asyrý úshin, aldyn ala esep boıynsha, shamamen 516 mlrd teńge kerek», - degen Qaıyrbek Óskenbaev munyń bári Nur Otan partııasynyń saılaýaldy baǵdarlamasynan týyndaıtynyn eske saldy.

«2022 jyly 11 jobany bastaý josparlanǵan. 2023 jyly – 12 joba, 2024 jyly – 13 joba, 2025 jyly 17 joba iske asady.

Asqar Uzaqbaıuly, atalǵan sharalardy iske asyrý eldegi ekologııalyq jaǵdaıǵa jaǵymdy áser etedi jáne mınıstrlik jetekshilik etetin salalarda jasyl tehnologııalardy tereńdetýge demeý bolady. 2060 jylǵa qaraı kómirtekti beıtaraptyqqa qol jetkizý jónindegi strategııalyq mindetti iske asyrýǵa yqpal etedi», - dedi vedomstvo ókili.

Aıta keteıik, Indýstrııa jáne ınfraqurylymdyq damý birinshi vıtse-mınıstri Úkimet otyrysynda eldegi elektromobıl qýattaıtyn stantsııalardyń naqty sanyn atady.