52 jolaýshysy bar halyqaralyq avtobýs buzylyp, jolda qalyp qoıdy

ASTANA. KAZINFORM — Almaty – Ekaterınbýrg baǵytyndaǵy respýblıkalyq mańyzy bar avtojolda qutqarýshylar jolda qalyp qoıǵan halyqaralyq jolaýshylar avtobýsyna jedel kómek kórsetti.

- Oqıǵa shekara beketinen 7 shaqyrym qashyqtyqta bolǵan. Avtobýs Tájikstan Respýblıkasynan Reseı Federatsııasyna bara jatqan. Salonda 52 jolaýshy, onyń ishinde 15 bala bolǵan, - delingen aqparatta.

Tótenshe jaǵdaılar mınıstrliginiń málimetinshe, qutqarýshylar oqıǵa ornyna dereý jetip, arnaıy tehnıkanyń kómegimen avtobýstyń qozǵaltqyshyn qaıta iske qosqan.

Vedomstvo saparǵa shyǵar aldynda kólik quraldarynyń tehnıkalyq jaǵdaıyn muqııat tekserý qajet ekenin eske salady.

Aıta keteıik, Almatyda 4 kólik pen avtobýs soqtyǵysyp, 23 adam zardap shekti.