52 shyǵysqazaqstandyq Jańa jyl qarsańynda qonys toıyn toılady

ÓSKEMEN. QazAqparat – Óskemenniń 19-shaǵyn aýdanynda Jańa jyl qarsańynda «Nurly jer» nesıeleý ıpotekalyq baǵdarlamasy aıasynda jańa páterlerdiń kiltterin tabystaý rásimi ótti, dep habarlaıdy QazAqparat.

Saltanatty sharaǵa ShQO ákimi Danıal Ahmetov qatysty. Aımaq basshysynyń qolynan «Turǵyn úı qurylys jınaq banki» AQ-nyń 52 salymshysy kiltterin aldy.

«Kópten kútetin merekemiz taǵy bir qýanyshty oqıǵamen qatar kelýi ómirde jıi bolady. Men sizderge baqyt, densaýlyq tileımin. Úılerińiz qýanyshqa, balalardyń kúlkisine tolsyn», – dedi Danıal Ahmetov.

Úıge qol jetkizgen jandardyń biri Krıstına Komarova óz qýanyshymen bólisti.

«Men mereke qarsańynda osyndaı qýanyshqa kenelgenime óte qýanyshtymyn. Endi meniń eki bólmeli páterim bar. Men osyny qatty armandadym», - dedi ol.

«Turǵyn úı qurylys jınaq banki» AQ ShQO fılıaly dırektorynyń orynbasary Dáýren Myrzataevtyń aıtýynsha, bıyl «Nurly jer» baǵdarlamasy aıasynda nesıelik turǵyn úı baǵytyna 430 páterlik 4 úı salynyp, iske qosyldy. Kelesi jyly atalǵan baǵdarlama boıynsha 742 páterlik 9 úı salý josparlanyp otyr. 2019 jyly «Turǵyn úı qurylys jınaq banki» AQ «Nurly jer» baǵdarlamasy boıysha 17 mlrd. teńgege 2200 nesıe berdi.