52 myńnan astam kásipkerlik sýbektisiniń jobalaryna qarjylyq qoldaý kórsetiledi - Erǵalıev

NUR-SULTAN. QazAqparat – 52 myńnan astam kásipkerlik sýbektisiniń jobalaryna qarjylyq qoldaý kórsetiledi. Bul týraly Ortalyq kommýnıkatsııalar qyzmetindegi baspasóz máslıhatynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

Mınıstrdiń atap ótýinshe, Kásipkerlikti damytý jónindegi ulttyq jobanyń «Kásipkerlerdiń ósýin jedeldetý» baǵyty boıynsha kásipkerlerge ákimshilik júktemeni azaıtý josparlanǵan .

«Memlekettik organdardyń aqparattyq júıelerin «Bızneske arnalǵan úkimet» portalyna ıntegratsııalaý 2025 jyly ShOB sýbektileri úshin kórsetilgen memlekettik qyzmetter úlesin 40 paıyzǵa deıin jetkizýge múmkindik beredi. Kredıtter boıynsha syıaqy mólsherlemesiniń bir bóligin sýbsıdııalaý jáne kepildik berý usynylady. Jańa bıznes-ıdeıalardy iske asyrý úshin granttar bólý aýylda 55 myń jańa kásipkerlik sýbektisin qurýǵa múmkindik beredi», - dedi ol.

Sonymen birge mınıstr qarjylyq qoldaý is-sharasy kásipkerlik sýbektileriniń 52 myńnan astam jobasyna usynylatyndyǵyn aıtady.

«Ulttyq taýar ótkizý jelisin qalyptastyrý boıynsha jumys jalǵasady. Bólý, satý jáne saqtaýǵa arnalǵan 24 kóterme-taratý ortalyǵyn qurý; 5 transshekaralyq saýda ortalyǵyn qurý men jańǵyrtý; sondaı-aq, statsıonarlyq formatta 103 saýda nysanyn jańǵyrtý kózdelýde. Nátıjesinde kópformatty saýda nysandarynyń sany 6-dan 132 birlikke deıin artady», - dedi Áset Erǵalıev.