«QazTemirTrans» AQ burynǵy vıtse-prezıdenti 5,2 mıllıard teńge jymqyrdy degen kúdikke ilindi
ASTANA.KAZINFORM - Qazaqstan Qarjylyq monıtorıng agenttigi «QazTemirTrans» AQ-nyń burynǵy vıtse-prezıdenti A.A.Kapenovke qatysty qyzmettik ókilettigin asyra paıdalaný jáne aqsha jymqyrý faktileri boıynsha sotqa deıingi tergep-tekserý júrgizip jatqanyn habarlady.
Tergeý amaldaryna saı, A.A.Kapenov qyzmettik jaǵdaıyn paıdalana otyryp, júk vagondaryn basqarý qyzmetterin kórsetý kezinde baılanysy bar kompanııalarǵa zańsyz artyqshylyqtar jasaǵan.
Saldarynan «QazTemirTrans» AQ-ǵa 5,2 mlrd teńgeden astam mólsherde zalal keltirilgen. Qazirgi ýaqytta A.A.Kapenovke halyqaralyq izdeý jarııalanǵan. Sotpen oǵan qatysty «qamaýda ustaý» túrindegi bultartpaý sharasy sanktsııalanǵan.
Keltirilgen zalaldy óteý jáne zańsyz alynǵan aktıvterdi qaıtarý maqsatynda Bas kólik prokýratýrasy «Dostyq» stantsııasyndaǵy termınaldy sotqa deıin tárkileý týraly ótinish joldaǵan.
Astana qalasynyń qylmystyq ister jónindegi aýdanaralyq sotynyń qaýlysymen atalǵan múlik memleket kirisine ótkizildi.
Tergeý jalǵasyp jatyr.
Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge málimetter jarııalaýǵa jatpaıdy.
Aıta ketý kerek, múlikti tárkileý Qazaqstan Respýblıkasynyń kólik-logıstıkalyq áleýetin damytý tujyrymdamasyn iske asyrýǵa yqpal etedi.
Eske sala keteıik, «Qaztemirtrans» Almaty fılıaly dırektorynyń ustalýyna qatysty túsinikteme berdi.
«Qaztemirtrans» AQ-nyń burynǵy top menedjeri D.Álmýsınge halyqaralyq izdeý jarııalandy.
