+51°C: Abadan álemdegi eń ystyq qalaǵa aınaldy

ASTANA. KAZINFORM – Keıingi kúnderi Irannyń ońtústik aımaqtarynda aýa temperatýrasy kúrt kóterilip, Abadan qalasy 24 saǵatta álemdegi eń ystyq qala bolyp tirkeldi, dep habarlaıdy Zamin.uz   Eldorado Weather-ge silteme jasap.

Abadandaǵy temperatýra Tselsıı boıynsha 51°C-qa jetken. Bul jahandyq jylyný kórsetkishteri boıynsha óte joǵary kórsetkish sanalady. Osy rette Irannyń taǵy úsh qalasy – Omıdııa, Ahvaz jáne Dezfýl da álemniń eń ystyq 15 qalasynyń tizimine endi.

Meteorologtardyń aıtýynsha, Irannyń ońtústigindegi mundaı joǵary temperatýra «qyzǵan aýa aǵyndary» men «atmosferalyq ylǵaldylyqtyń tómendeýine» baılanysty bolyp otyr. Bul faktorlar jylýdy odan ári kúsheıtip, adam densaýlyǵyna aýyr áser etýi múmkin.

Densaýlyq saqtaý uıymdary turǵyndardy saqtyq sharalaryn saqtaýǵa shaqyrady. Kishkentaı balalar, qart adamdar jáne júrek-qan tamyrlary aýrýlary bar adamdar, ásirese tikeleı kún sáýlesinen qorǵalýy kerek. Dárigerler kóshege shyqpaýǵa, suıyqtyq qabyldaýdy kóbeıtýge jáne kondıtsıonerlerdi qoldanýǵa keńes beredi.

Baqylaýshylardyń aıtýynsha, aldaǵy kúnderi aýa temperatýrasy qaıtadan kóterilýi múmkin. Sondyqtan óńir turǵyndary men qonaqtary qaýipsizdik erejelerin saqtaýy kerek.

Eske sala keteıik, Ispanııada aptap ystyq sońǵy eki aıda 1 180 adamnyń ómirin jalmady.