514 sheteldikke 5 jylǵa deıin Qazaqstanǵa kelýge tyıym salyndy
«Qazaqstanda sheteldikterdiń bolý tártibin qamtamasyz etý men kóshi-qon zańnamasyn buzýshylyqtyń aldyn-alý maqsatynda memleketimizde 20 aqpannan bastap «Mıgrant» jedel-aldyn alý is-sharasy ótkizilip jatyr. Polıtsııa sheteldikterdiń turatyn mekenjaılary, qurylys obektileri, naryqtar, sheteldik jumys kúshin paıdalanatyn uıymdar men jumys berýshilerdi tekserýde», - dedi Shuǵyla Turlybek mınıstrliktiń baspasóz qyzmeti alańynda ótken brıfıngte.
Resmı ókildiń atap ótýinshe, operatsııanyń alǵashqy aptasynyń nátıjesinde kóshi-qon zańnamasyn buzǵan 6 836 quqyq buzýshy anyqtaldy. Onyń ishinde 1 814 sheteldiktiń memlekette bolý tártibin buzýy, 1 886 sheteldiktiń zańsyz jumys jasap jatqan faktileri men 356 zańsyz jumys kúshin paıdalaný faktileri anyqtaldy.
«Polıtsııa sheteldikterdiń kelýi týraly habarlamany ýaqytyly joldamaǵan 2 727 jeke jáne zańdy tulǵalar ákimshilik jaýapkershilikke tartyldy. Memleketimizdiń kóshi-qon zańnamasyn buzǵany úshin 514 sheteldik Qazaqstan Respýblıkasynan tys shyǵaryldy. Onyń ishinde 130 sheteldik májbúrli túrde tys shyǵaryldy. Barlyq sheteldikterge Qazaqstan Respýblıkasyna kelýine 5 jylǵa deıin tyıym salynǵan», - dedi ol.
