51 jastaǵy qazaq bapkeri reseılik klýbty jattyqtyrady
NUR-SULTAN. QazAqparat – Belgili fýtbol mamany Ilshat Aıtqulov Reseı chempıonatynda oınaıtyn «Orynbor» klýbyn jattyqtyrady, dep habarlaıdy QazAqparat klýbtyń resmı saıtyna silteme jasap.
51 jastaǵy Ilshat Nurǵalıuly «Orynbor» klýbynyń bas bapkeri Konstantın Emelıanovty aýystyrdy. Aıtqulov bas jattyqtyrýshynyń mindetin atqarýshy bolyp taǵaıyndaldy, ol osy qyzmetti maýsym sońyna deıin atqaratyn bolady.
«Aıtqulov komandaǵa maýsym sońyna deıin jetekshilik etedi. Onyń bolashaǵy komandanyń nátıjelerine baılanysty bolady. Bizdiń mindetimiz — chempıonatty tabysty aıaqtaý», - dedi «Orynbor» FK qamqorshylyq keńesiniń múshesi Vasılıı Stolypın.
Ilshat Aıtqulov «Orynborda» 2005 jyldan beri jumys istep keledi. Transfermarkt.de portalynyń málimetinshe, Aıtqulovtyń ulty men azamattyǵy – qazaq.
Esterińizge sala keteıik, bul klýbta Qazaqstan quramasynyń jartylaı qorǵaýshysy Islambek Qýat ta oınaıdy.
