51 mln teńge jalaqy qaryzy bar kompanııa basshysy ustatpaı júr - Eńbek mınıstrligi
ASTANA. QazAqparat - Qaraǵandy oblysynda jumys júrgizgen, jalaqy qaryzy 51 mln teńgege jetken reseılik «Otto-Servıs» kompanııasynyń basshysy ustatpaı júr. Bul týraly Astanada ótken baspasóz máslıhatynda QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıteti tóraǵasynyń orynbasary Tólegen Ospanqulov málim etti, dep habarlaıdy QazAqparat tilshisi.
«Tórt quzyrly organ (Bas prokýratýra, Ádilet mınıstrligi, Qarjy mınıstrligi men Eńbek jáne halyqty áleýmettik qorǵaý mınıstrligi) jalaqy qaryzy boıynsha apta saıyn monıtorıng júrgizedi. Jalaqy qaryzynyń ýaqyty úsh aıdan assa bólek monıtorıngti qolǵa alamyz. Demek, jergilikti atqarýshy organdar tıisti jumystardy atqarady. Jergilikti organdarda qazirgi ýaqytta «Daǵdarysqa qarsy shtabtar» qurylǵan. Úsh jaqty áleýmettik saladaǵy komıssııa bar. Sol komıssııalar jumys berýshilerdi qarap, kerek jerde jaza qoldanyp, kestesin ázirlep, jumysshylardyń eńbegin qorǵaýdy júzege asyrady», - deıdi Tólegen Ospanqulov.
Mınıstrlik ókiliniń aıtýynsha, qazirgi kúni jalaqy qaryzyn óteı almaı otyrǵan 27 kásiporyn bar. 440 mıllıon teńgelik jalaqy qaryzy (2018 jyldyń 12 aqpany boıynsha) - osy kásiporyndardyń bereshegi. Onyń ishinde 11 mekemeniń qaryzy 3 aıdan asyp ketken.
«Naqtyraq aıtqanda, bul somanyń 51 mıllıon teńgesi - Qaraǵandy oblysyndaǵy «Otto-Servıs» degen mekeme bar (...) Kezinde Qaraǵandy oblysynda ol áskerı qyzmetterge kómek jasap júrgen mekeme bolatyn. Biraq, ol Reseıdiń mekemesi edi. Basshysy taptyrmaı júr. Bul rettegi kúrdeli másele - osy. Sondyqtan, biz ol jaǵdaı týraly Reseı memleketine talaı hat jazdyq. Qazirgi tańda Reseı tarapymen kelisim shartqa otyraıyq dep jatyrmyz. Sol kelisim sharttyń ishinde tıisti másele qaralady dep eseptep otyrmyz», - deıdi Tólegen Ospanqulov.
