504 ákimshilik is, 130 mln teńge aıyppul: Jambylda qurylystaǵy zańsyzdyqtar anyqtaldy
TARAZ. KAZINFORM — Jambyl oblysynda ótken jyly qurylys nysandaryna júrgizilgen tekserýler barysynda júzdegen zań buzýshylyq anyqtaldy. Sonyń aıasynda tapsyrys berýshiler, merdigerler, jobalaýshylar men qurylysty qadaǵalaý mamandary jaýapkershilikke tartyldy.
Oblystyq memlekettik sáýlet-qurylys baqylaý basqarmasynyń málimetinshe, 2025 jyly 504 ákimshilik is qozǵalyp, 130,3 mıllıon teńge aıyppul salyndy.
Quqyq buzýshylyqtardyń deni qurylys merdigerleriniń qyzmetine qatysty boldy. Ákimshilik jaýapkershilikke 399 tapsyrys berýshi tartyldy. Sondaı-aq 30 merdiger, 15 jobalaýshy, 5 saraptama uıymy, geologııalyq barlaý jumystaryn júrgizetin eki kompanııa da jazalandy.
Sondaı-aq qurylysqa jetekshilik etetin mamandarǵa qatysty ákimshilik is qozǵaldy. 34 tehnıkalyq qadaǵalaý mamany men 19 konstrýktorlyq qadaǵalaýshy jaýapkershilikke tartyldy.
Tekserý qorytyndysy boıynsha 9 jobalaýshy mamanǵa jáne 17 tehnıkalyq qadaǵalaý mamanyna aıyppul salynyp, saraptamalyq kýálikteri alty aıǵa toqtatyldy.
Qurylys-montaj jumystaryn sapasyz júrgizgeni jáne qurylys normalary men erejelerin buzǵany úshin birqatar merdiger kompanııalar men jobalaý jáne izdestirý uıymdary da jaýap berýge májbúr boldy. Zańda bir jyl ishinde qaıtalanatyn buzýshylyqtar mundaı kompanııalardyń lıtsenzııasynan aıyrylyp qalýy múmkin ekenin kórsetedi.
Eske salaıyq, Astana qalasyndaǵy zańsyz qurylys isi sotqa jetken bolatyn.