500 jáshik araq-sharap ónimderin shekaradan zańsyz ótkizýge tyrysqan reseılik azamat ustaldy
ASTANA. QazAqparat - Qazaqstandyq shekarashylar úlken kólemdegi araq-sharap ónimderin zańsyz ótkizbek bolǵan azamattyń jolyn kesti.
«Aqtóbe shekara otrıadyna qarasty «Jaısań avto» baqylaý-ótkizý beketiniń baqylaýshylary jalpy kólemi 3000 lıtr bolatyn araq-sharap ónimderin zańsyz ótkizýge tyrysqan 25 jastaǵy Reseı azamatyn ustady. Teksere kelgende onyń qujattary durys bolmaı shyqty», dep habarlaıdy QR UQK ShQ baspasóz qyzmetinen.
Kórshi eldiń azamaty Reseıge «MAN» kóligimen jol júrip bara jatqan, al kólik ústine árqaısysyna 12 bótelkeden salynǵan 500 jáshik esh qujatsyz tıelgen.
Atalǵan oqıǵa týraly quqyq qorǵaý organdary habarlandyryldy, tergeý amaldary júrgizilýde.
