500 jáne 1000 teńgelik banknottardy qabyldamaıtyn kásipkerlerge aıyppul salynady
ALMATY. QazAqparat - QR Ulttyq banki 500 jáne 1000 teńge nomınalyndaǵy banknottardy qabyldaýdan bas tartqan úshin aıyppul salynatynyn eskertti, dep habarlaıdy QazAqparat tilshisi.
«2006 jylǵy úlgidegi 500 teńgelik banknottar zańdy tólem quraly bolyp tabylady. Olardy tólemniń barlyq túri boıynsha qabyldaýǵa mindetti. Eger kásipkerler mundaı aqshany qabyldaýdan bas tartsa, QR Ákimshilik quqyq buzýshylyq týraly kodekstiń 206-babyna sáıkes, eskertý jasalady. Eger jaǵdaı bir jyl ishinde taǵy qaıtalansa, onda 5-ten 25 AEK (1 AEK – 2651 teńge) kólemine deıin aıyppul salynady»,– dep habarlady Ulttyq bankten.
Mundaı shaǵymmen azamattar Ulttyq banktiń eń jaqyn bólimshesine júgine alady. Olar qajetti sharany qoldanady.
Sondaı-aq Ulttyq banktiń habarlaýynsha, «Kúltegin» túrki jazba eskertkishine arnalyp, 2013 jyly shyǵarylǵan 1000 teńgelik banknot – zańdy tólem quraly. Ol tólemniń barlyq túri boıynsha qabyldanýy tıis. Banknottar tek ábden tozǵan jaǵdaıda aınalymnan alynady.
Ekinshi deńgeıli bankter jáne bank operatsııalarynyń jekelegen túrlerin júzege asyratyn uıymdar banknottardy qabyldaýdan, aıyrbastaýdan bas tartsa, olarǵa 50 AEK mólsherinde aıyppul salynady.
«Aqshany almaǵan jaǵdaıda muny vıdeoǵa túsirip, ne bolmasa sizden bul aqshany qabyldaı almaıtynyn jazbasha jazyp berýin talap etińiz», - deıdi Ulttyq banktegiler.
500 teńgelik banknottar 2020 jyldyń 10 maýsymyna deıin aınalymda bolady.
