500 velosıpedshi Almaty kóshelerimen júrip ótti
ALMATY. QazAqparat - Almatyda «Sporttyq Almaty» baǵdarlamasy aıasynda ótken kezekti velosherýge 500-den asa adam qatysty, dep habarlaıdy QazAqparat tilshisi.
Almaty tarıhyndaǵy 101-shi velosherý ádettegideı «Nurly Taý» bıznes ortalyǵynan bastalyp, «Ǵylym ordasy» memlekettik mekemesi janynda aıaqtaldy.
Sportshylar 13 shaqyrym qashyqtyqty baǵyndyrdy. Uıymdastyrýshylar 2 turaqty qatysýshyǵa arnaıy fýtbolka berip, velosaqshy retinde saılady. Olar jol boıyndaǵy qaýipsizdikti baqylap júrdi.
Sonymen qatar, márege jınalǵan qatysýshylardyń arasynda dástúr boıynsha lotereıa oınatylyp, syılyqtar taratyldy. Basty syılyq - velosıped, búgin týǵan kúnin atap ótip jatqan Syrym esimdi jetkinshekke berildi.
Al, velosaqshynyń qyzmetin atqarǵan Ádilet Almahanov márege jetip, óz oıymen bólisti.
«Búgingi velosherý men úshin ádettegideı jeńil ótti. Uıymdastyrýshylarǵa alǵysym sheksiz. Qala turǵyndary men qonaqtaryna sportpen aınalysýǵa jaǵdaı jasap, túrli syılyqtar oınatady. Búgin velosaqshynyń qyzmetin atqaryp, barlyǵyn óz baqylaýymda ustadym. Aldaǵy ýaqytta da qatysyp, velosıped utyp alsam degen armanym bar. Bálkim, bir kúni meniń de jolym bolyp qalar», - dedi Ádilet.
Esterińizge sala keteıik, atalmysh shara «Sporttyq Almaty» buqaralyq sportty damytý jobasy aıasynda ár jeksenbi saıyn ótkiziledi.
