500 teńgeniń parasy týraly xabar bergen salyqshy 70 myń teńge syıaqy alýy múmkin

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamenti 500 teńgeniń parasy týraly xabar bergen salyqshyny syıaqyǵa usyndy, dep xabarlaıdy QazAqparat tilshisi.

Sybaılas jemqorlyqtyń aldyn alý basqarmasy basshysynyń mindetin atqarýshy Danııar Raıymbaevtyń sózine qaraǵanda, 500 teńgeniń parasy týraly xabar bergen salyq qyzmetkeri - jas maman. Onyń jumysqa kelgenine 2 aı ǵana boldy.

«Bizde zań boıynsha salyq esebi jeke kabınet arqyly tapsyrylady. Árbir adam ózi kelip, deklaratsııany toltyrýy tıis. Alaıda ol jerde keńes beretin maman da bar. Ol barlyq adamdarǵa kómektesip otyrady. Kásipker kelinshek dál sol mamanǵa para bergen. Ol kelgen boıda zańsyz syıaqy beremin dep, qaıta-qaıta kómek berýdi suraǵan eken. Sebebi kompıýter arqyly esep berýdi bilmeıdi. Alaıda salyq qyzmetkeri aqshany birden almaımyn dedi. Kýágerler de onyń sózin rastap otyr. Degenmen, keńesshi maman basqa bireýge kómektesip jatqanda jańaǵy kásipker áıel 500 teńgeni bildirtpeı salyp jiberdi. Sóıtip, ile-shala kabınetten shyǵyp ketti. Artynan salyq qyzmetkeri qaltasynan aqshany taýyp alǵanda birden kelinshektiń salyp ketkenin bildi. Beınebaqylaý kameralarynan da sonyń bárin baıqaýǵa bolady. Jas jigit birden bastyǵyna xabar berdi. Sebebi bireýler ádeıi isteýi múmkin jáne taǵysyn taǵy», - dedi D.Raıymbaev QazAqparat tilshisine bergen suxbatynda.

Onyń aıtýynsha, atalǵan oqıǵa Astana qalasy Almaty aýdandyq memlekettik kirister basqarmasynda bolǵan. Búginde 500 teńgeniń parasy týraly xabar bergen jas qyzmetkerge syıaqy berý týraly usynys jasaldy.

«Zań boıynsha sybaılas jemqorlyq áreketteri týraly xabarlaǵan adamdarǵa syıaqy berý qarastyrylǵan. Bizdiń departamentimiz tıisti usynysty jasady. Ákimshilik tártip buzýshylyqtar týraly xabar bergeni úshin 30 AEK (72 150 teńge) kóleminde syıaqy qarastyrylǵan. Jańaǵy qyzmetker osy syıaqyny alýy ábden múmkin», - dep atap kórsetti D.Raıymbaev.

Aıta keteıik, keshe Astana qalasy boıynsha memlekettik kirister departamenti 500 teńgeniń parasy týraly xabar taratty. Naýryz aıynda A.Jumaqaeva degen kásipker salyq tóleýshiniń jeke kabıneti arqyly esep tapsyrǵanda 500 teńge kóleminde para bergen. Salyq qyzmetkeri A.Quspanov birden óz basshylyǵyna xabarlady. Ótken aıda shyqqan sot sheshimine sáıkes, kásipker kelinshek 336 700 teńge kóleminde aıyppul tóleýge mindetteldi.