500 teńgeniń parasy: Salyq qyzmetkeri ol aqshany nege birden qaıtara salmady

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamenti 500 teńgeniń parasyna qatysty túsinik berdi, dep xabarlaıdy QazAqparat tilshisi.

Departament basshysynyń orynbasary Roman Kımniń aıtýynsha, búginde atalǵan jaǵdaıǵa qatysty ekiudaı pikir bar. Bireýler qoldasa, endi bireýler salyqshynyń áreketin synap jatyr. Halyq arasynda «500 teńgeni sol jerde qaıtara salmady ma?» degen suraq jıi qoıylady. «Bizde vıdeo bar. Onda salyq qyzmetkeriniń parany almaımyn degenin anyq kórýge bolady. Ol jerde bylaı boldy. Salyqshy aldymen jańaǵy kásipker kelinshekke kómektesti. Sosyn basqa bireýge kómektesip jatqanda kelinshek onyń qaltasyna 500 teńgeni salyp jiberdi. Ol baıqaǵan da joq. Beınejazbada bári bar. Artynan aqshany kórgennen keıin salyqshy jigit bastyǵyna baryp, paranyń berilgeni jaıynda xabarlady. Negizi, zań boıynsha ol durys istedi. Salyq qyzmetkeri zańsyz syıaqynyń berilgeni týraly birden xabarlady. Másele, paranyń somasynda emes. 500 teńge bolsyn, 1 000 teńge bolsyn, para berildi me, boldy. Menińshe, xalyq ondaıǵa áli daıyn emes sııaqty. Biraq bárimizdiń azamattyq ustanymymyz osyndaı bolsa, jemqorlyqty barynsha azaıtýǵa bolady», - dedi R.Kım QazAqparat tilshisine bergen suxbatynda.

Aıta keteıik, keshe Astana qalasy boıynsha memlekettik kirister departamenti 500 teńgeniń parasy týraly xabar taratty. Naýryz aıynda A.Jumaqaeva degen kásipker salyq tóleýshiniń jeke kabıneti arqyly esep tapsyrǵanda 500 teńge kóleminde para bergen. Salyq qyzmetkeri A.Quspanov birden óz basshylyǵyna xabarlady. Ótken aıda shyqqan sot sheshimine sáıkes, kásipker kelinshek 336 700 teńge kóleminde aıyppul tóleýge mindetteldi.