500 synyp aǵylshyn tilinde bilim alady -mınıstr Saǵadıev
ASTANA. QazAqparat - Bıylǵy oqý jylynda atalǵan bastama aldymen eksperıment retinde qolǵa alynady. 500 synyptyń ata-analary oǵan kelisip, óz qolhattaryn berdi, dep habarlaıdy QazAqparat tilshisi.
«Biz úshin atalǵan eksperıment asa mańyzdy. Bir jyl boıy onyń nátıjesin baqylaımyz. Balalardy, ata-analardy, mektep muǵalimderin jáne taǵysyn taǵy. Osy eksperımenttiń nátıjesin aldymen jan-jaqty talqylaımyz. Sóıtip, pán boıynsha úsh tildi oqytýǵa kóshýdiń naqty kestesin qabyldaımyz», - dedi QR Bilim jáne ǵylym mınıstri Erlan Saǵadıev búgin Úkimette ótken baspasóz máslıhatynda.
Mınıstrdiń aıtýynsha, aǵymdaǵy jyly mektep muǵalimderin jappaı aǵylshyn tiline úıretý sharalary bastalady. Qazirgi kezde 4 myńǵa jýyq muǵalim aǵylshyn kýrstaryn bastap ketti. Qyrkúıek aıynda olarǵa taǵy 8 myń muǵalim qosylady.
Aıta keteıik, búgingi baspasóz máslıhatynda mınıstr qazaq tilin bilmeıtin jarty mıllıon oqýshyǵa jańa ádispen til úırenetinin jetkizdi.
