500 myńnan astam oqýshy saýyqtyrý demalysyna jiberiledi - mınıstrlik
Vedomstvo aqparatyna sáıkes, osy jazda 13 myń balalar lageri men demalys uıymdarynyń jumysyn uıymdastyrý josparlanǵan. Qarajat jergilikti atqarýshy organdardyń bıýdjetinen bólinetin bolady. Epıdemıologııalyq jaǵdaı kúrdelenip ketpese, jazǵy demalysqa 1 mıllıonnan astam oqýshy bara alady.
Jazǵy saýyqtyrý naýqany oqý jyly aıaqtalǵannan keıin birden bastalady. Bul rette balalar lagerlerin ashý jáne olardyń tolymdylyǵy týraly sheshimdi óńirlik sanıtarlyq dárigerler qabyldaıdy. Munyń bári óńirlerdegi epıdemıologııalyq jaǵdaıǵa baılanysty.
«Sanıtarlyq normalar qatań saqtalýy kerek. Óńirler tıisti jumys júrgizdi, saýyqtyrý lagerleri balalardy qabyldaýǵa daıyndalyp jatyr. Óńirdegi sanıtarlyq-epıdemıologııalyq jaǵdaı eskeriletin bolady. Sanıtarlyq dárigerlermen birge balalardyń qaýipsiz demalýy qamtamasyz etilýi kerek. Balalardyń quqyqtaryn qorǵaý komıteti bul máseleni baqylaýǵa alýǵa tıis», — dep tapsyrdy
Sonymen qatar jazǵy kezeńde olımpıadalyq rezervtegi jazǵy mektepter, til mektepteri, debat klýbtary jáne túrli damytý úıirmeleri jumys isteıdi.
Qaýipsizdikti qamtamasyz etý maqsatynda jedel áreket etý úshin arnaıy jumys toby quryldy. Onyń quramyna bilim basqarmalary basshylarynyń orynbasarlary, múddeli memlekettik organdar men qoǵamdyq uıymdardyń ókilderi engen.
Respýblıkanyń barlyq óńirinde «qaýipsiz attraktsıon» reıdtik sharalary ótkiziledi. Sonymen birge «Balaǵa laıyq» jobasy bastaldy. Máselen jazǵy ýaqytta balalardyń quqyqtaryn qorǵaý komıtetiniń resmı paraqshalarynda balalar men olardyń ata-analary maquldaǵan dámhanalardyń, saıabaqtardyń, skverlerdiń jáne basqa da obektilerdiń fotosýretteri ornalastyrylatyn bolady.
«Sondaı-aq QR Tótenshe jaǵdaılar mınıstrligimen birlesip sýda jáne órt kezinde balalardyń qaýipsizdigin qamtamasyz etýdiń biryńǵaı tásilderi ázirlendi. Ata-analarǵa qyraǵylyq tanytyp, balalardy úlkenderdiń qaraýynsyz sý qoımalaryna jibermeýge keńes beremiz», - dedi QR BǴM baspasóz qyzmetinen.
