500 myń teńgeni terezege jumsaımyn - 10-qabattan qulaǵan balany qutqarǵan astanalyq
ASTANA. QazAqparat - Astanada 10-qabattan qulap ketken 7 jasar balany qutqarǵan Artem Karev Astana ákimdigi tabystaǵan 500 myń teńgelik syıaqyny qaıda jumsaıtynyn aıtyp berdi, dep habarlaıdy QazAqparat tilshisi.
«Aqshaǵa zárý emespin. Ózim jaıly áleýmettik jelidegi aqparattardy qarap otyryp, terezelerdi balanyń qulap ketý qaýpinen saqtaıtyn qorǵanys qurylǵysyn jasaıtyn adamdy kózim shalyp qalǵan edi. Meniń oıymsha, eń durys sheshim - bıik qabattarda turatyn, alaıda terezege qorǵanys qurylǵysyn qoıýǵa shamasy joq adamdarǵa kómektesý», - dedi Artem Karev Astana ákimdiginde tilshilerdiń suraǵyna jaýap bere otyryp.
Ol sonymen birge, ózi qutqaryp alǵan balanyń týǵan-týystarymen áli kezdespegenin aıtty.
«Men balanyń týǵan-týystaryn kórgen joqpyn. Álbette, báriniń basyna jaı túskendeı bolyp jatqan shyǵar. Tipti anasy aýrýhanaǵa tústi dep te estidim», - deıdi ol.
Artem Karev syn saǵatta qalaısha balkonǵa shyqqanyn esine aldy.
«Úıde otyrǵanymda balkonǵa meni bireý jetelegendeı kórindi. Sodan baryp bireýlerdiń daýysyn estip qaldym. Tómenge qarasam, kóptegen adamdar joǵary jaqqa qarap, aıǵaılap tur. Joǵary qaradym da, balany kózim shalyp qaldy. Bala anasyn shaqyryp, járdem surap ilinip tur eken», - deıdi Artem Karev.
Aıta ketsek, búgin Astana qalasynyń ákimi Baqyt Sultanov búgin 10-qabattan qulaǵan 7 jasar balany qutqarǵan Astana turǵyny Artem Karevty marapattaǵan bolatyn. Beıbit kúnniń batyry atanǵan jas jigitke 500 myń teńgeniń sertıfıkaty tabystaldy.
Keshe Astana turǵyny Artem Karev 10 qabattan qulap ketken 7 jasar balany qutqaryp qalǵan edi. Oqıǵa Saryarqa aýdanynyń Jeńis dańǵylyndaǵy kópqabatty úılerdiń birinde 24 qyrkúıekte bolǵan.
«Tańǵy 10:16-da Jeńis dańǵylyndaǵy 28-úıde jas balanyń 10-qabattan qulaý qaýpi týraly habar kelip tústi. 10:22-de oqıǵa ornyna Astananyń №2 arnaıy mamandandyrylǵan órt sóndirý bólimi jetken jáne olar kelgenshe balany qutqaryp úlgergen», - dep habarlaǵan edi QR ІІM TJ komıtetiniń resmı ókili Rýslan Imanqulov.
