500 myńnan astam balany mektepke daıarlaýǵa qarajat bólindi
ASTANA. KAZINFORM — Ákimdikter 500 myńnan astam balany mektepke daıarlaý úshin qarajat bóldi. Bul týraly Oqý-aǵartý mınıstrligi Bala quqyqtaryn qorǵaý komıtetiniń tóraǵasy Nasymjan Ospanova aıtty.
«Jyl saıyn qoldaýdy qajet etetin otbasy balalaryna mektepter arqyly materıaldyq kómek kórsetiledi. Bul sharanyń negizgi maqsaty — muqtaj ata-analarǵa balalaryn mektepke daıyndaý úshin qoldaý kórsetý. Materıaldyq kómek kıim-keshek, onyń ishinde mektep formasy, aıaq kıim, oqý quraldaryn satyp alý úshin bólinedi. Osy maqsatta ákimdikter 500 myńnan astam balany mektepke daıarlaý úshin tıisti qarajatty bóldi», — dedi komıtet tóraǵasy Ortalyq kommýnıkatsııalar qyzmetindegi brıfıngte.
Onyń atap ótýinshe, materıaldyq kómek kólemi barlyq óńir úshin sońǵy úsh jylda 2,5-ke artty.
Naqty aıtqanda, 17 myńnan, 43 myń teńgege ósip otyr.
«Qazirgi tańda óńirler mektep jınaqtaryn satyp alý úshin ata-anasynyń nemese olardy almastyratyn tulǵalardyń esepshotyna qarajatty aýdarýdy bastady. Ata-analar qajetti taýarlardy satyp alǵannan keıin ony rastaıtyn qujatty usynýlary kerek. Materıaldyq kómekti alý úshin ár ata-ana mektep dırektorynyń atyna ótinish jazady. Búginde ata-analardyń esepshotyna 3 mlrd teńgeden astam qarajat aýdaryldy, 77 myńnan astam bala qamtyldy», — dedi Nasymjan Ospanova.
