«500 myńnan asa kólik júr»: Astanada keptelisti azaıtý úshin qandaı shara qolǵa alyndy
ASTANA. KAZINFORM — Astana qalasynyń ákimi Jeńis Qasymbek elorda joldaryndaǵy keptelisti azaıtý úshin qandaı sharalar qabyldanyp jatqanyn aıtty.
Ákimniń aıtýynsha, qalada 437 myń avtokólik tirkelgen. Oǵan qosa, kún saıyn qalaǵa 90 myń tranzıttik kólik kiredi.
— Eń kóp keptelis tańǵy jáne keshki qarbalas ýaqytta, ásirese, Esil jáne Nura aýdandarynda, kópirlerge kireberisterde, sondaı-aq Máńgilik el, Qabanbaı batyr, Turan dańǵyldarynda, Saraıshyq, Qonaev, Dostyq kóshelerinde baıqalyp otyr. Máseleni sheshý úshin ákimdik jol-kólik ınfraqurylymyn jaqsartýǵa arnalǵan egjeı-tegjeıli Jol kartasyn ázirledi, — dedi J. Qasymbek Ortalyq kommýnıkatsııalar qyzmetinde ótken brıfıngte.
Bul rette qysqa merzimdi sharalar da óz nátıjesin bergen. Esil jáne Nura aýdandarynda ornalasqan memlekettik organdar men ulttyq kompanııalardyń (39 myń qyzmetker) jumys kestesi ózgertildi.
— Bul keste qazan aıynan bastap tolyq kólemde qoldanysqa endi, sonyń nátıjesinde tańǵy jáne kúndizgi ýaqyttaǵy jaǵdaı jaqsardy. Qarbalas saǵattarda qozǵalys jyldamdyǵy 10-15%-ǵa artty, bul joldardyń ótkizý qabiletiniń artqanyn kórsetedi. Negizgi magıstraldardaǵy júkteme 5-10%-ǵa tómendedi. Mysaly, qyrkúıek aıynyń basynda Máńgilik el dańǵylynan tańǵy qarbalas ýaqytta 4 152 avtokólik ótse, jumys kestesi ózgergen soń, ótkizý qabileti saǵatyna 4 420 kólikke deıin artty, al ortasha qozǵalys jyldamdyǵy 2 km/saǵ-qa ósti, — deıdi elorda ákimi.
Turan dańǵyly boıynsha qysqa merzimdi sharalardyń arqasynda tańǵy qarbalas ýaqytta kólikter sany 1 174-ke artty, ortasha jyldamdyq 3 km/saǵ-qa deıin ósti. Sondaı-aq Saraıshyq, Qonaev, Dostyq jáne Syǵanaq kóshelerinde de oń ózgerister baıqaldy.
Alaıda keshki ýaqytta keptelis saqtalyp otyr, ásirese negizgi shyǵý joldary men kópirlerde. Keshki qarbalas ýaqytta qozǵalys jyldamdyǵy ózgerissiz qalyp, qozǵalys qarqyny 4%-ǵa ǵana artqan.
— Qazirgi ýaqytta qoǵamdyq kólikpen jasalatyn saparlar úlesi 43%-dy quraıdy. Biz bul kórsetkishti 65%-ǵa deıin jetkizýdi kózdep otyrmyz. Bul kólik júıesi eń damyǵan qalalardyń deńgeıine sáıkes keledi, onda bul úles 70-80% shamasynda. Bıyl táýliktik jolaýshylar aǵyny 1,1 mln adamǵa jetti. Bul 2024 jylmen salystyrǵanda 37%-ǵa kóp. Qala turǵyndarynyń 96%-y aıaldamalarǵa jaıaý jete alady, — dep tolyqtyrdy J. Qasymbek.
Bıyl elordada 422 avtobýs satyp alyndy, avtopark 1 749 avtobýsqa deıin ulǵaıdy. Sońǵy eki jylda jyljymaly quramnyń jartysyna jýyǵy jańartylǵan.
— Bus Lane júıesi qazirdiń ózinde 140 shaqyrym aýmaqty qamtıdy, kelesi jyly taǵy 30 shaqyrym qosylady. 2026 jyly kommýnaldyq jáne jeke avtoparkterge taǵy 485 avtobýs jetkiziledi, olardyń 10%-y — elektrobýstar. Osylaısha, avtoparkterdegi jyljymaly quramnyń jalpy sany 2 100-ge jetedi, — dedi Jeńis Qasymbek.
Buǵan deıin Jeńis Qasymbek Astanadaǵy jeńil relsti kólik (LRT) júıesi aldaǵy 1-2 aıda iske qosylatynyn aıtqan edi.
Aıta keteıik, qarasha aıynda elordadaǵy halyq sany 1,6 mıllıon adamnan asqan. Buǵan deıin Jeńis Qasymbek qalanyń ınfraqurylymy qalaı jetildiriletinin aıtqan edi.