500 myńǵa «ótkizip berem»: Túrkistanda shekara «bıznesi» toqtatyldy

TÚRKІSTAN. KAZINFORM — Túrkistan oblysynda zańsyz kóshi-qonmen aınalysqan qylmystyq toptyń joly kesildi, dep habarlaıdy Polisia.kz.

Qazaqstan Respýblıkasy Іshki ister mınıstrligi zańsyz kóshi-qon arnalarynyń jolyn kesý boıynsha júıeli jumystar júrgizip keledi.

11 qyrkúıekte Túrkistan oblysynyń shekara mańyndaǵy aýdandarynda krımınaldyq polıtsııa qyzmetkerleri júrgizgen jedel-tergeý is-sharalarynyń nátıjesinde zańsyz kóshi-qon arnasyn uıymdastyrǵan qylmystyq toptyń áreketi áshkerelendi.

Toptyń tórt negizgi uıymdastyrýshysy men olardyń qatysýshylary ustalyp, ýaqytsha ustaý ızolıatoryna qamaýǵa alyndy. Tergeý barysynda olardyń kórshi elderden kelgen azamattarǵa memlekettik shekarany zańsyz kesip ótýge kómekteskeni anyqtaldy. Ózderiniń «qyzmeti» úshin kúdiktiler árbir mıgranttan 500 myń teńgege deıin aqsha alyp otyrǵan. Júrgizilgen tintý kezinde sheteldik pasporttar, jalǵan qujattar, elektrondy tasymaldaýshylar jáne baılanys quraldary tárkilendi.

— Atalǵan derek boıynsha Qylmystyq kodekstiń eki baby boıynsha — Zańsyz kóshi-qondy uıymdastyrý jáne Memlekettik shekarany qasaqana zańsyz kesip ótý» faktisi boıynsha sotqa deıingi tergep-tekserý bastaldy, — delingen habarlamada.

Іshki ister mınıstrligi kóshi-qon zańnamasyn buzýdyń kez kelgen deregi jazasyz qalmaıtynyn eskertedi. 

Budan buryn Túrkistan oblysynda er adam jubaıyn óltirip, artynsha ózine qol jumsaǵanyn jazǵanbyz.