500 myń qazaqstandyq tsıfrlyq platformalarda tabys taýyp júr – mınıstr
ASTANA. KAZINFORM – Qazaqstanda 20-dan astam tsıfrlyq platforma 500 myńnan astam adamnyń tabys tabýyna múmkindik berip otyr. Endi bul múmkindikterdi aýyl turǵyndaryna da qoljetimdi etý josparlanǵan. Bul týraly Úkimet otyrysynda Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev baıandady.
Mınıstrdiń aıtýynsha, tsıfrlyq ekonomıkanyń múmkindikterin aýyl turǵyndaryna jetkizý úshin baılanys ınfraqurylymyn damytý jáne birneshe baǵyt boıynsha pılottyq jobalardy iske qosý kózdelgen.
– Eń aldymen aýyl kásipkerlerin qoldanystaǵy marketpleısterge qosyp, óz ónimderin keńirek naryqqa shyǵarýǵa jaǵdaı jasalady. Ekinshi baǵyt – tapsyrystardy qabyldaý jáne berý pýnktteriniń jelisin keńeıtip, taýarlardy shalǵaı aýyldarǵa deıin jetkizýdi uıymdastyrý, – dep atap ótti mınıstr.
Úshinshi baǵyt halyqtyń tsıfrlyq saýatyn arttyrýǵa arnalǵan. Aýyl turǵyndary elektrondyq kommertsııany, tsıfrlyq platformalar men jasandy ıntellekt quraldaryn paıdalanýdy úırenedi.
Bul túrli óńirlerdegi kásipkerlikti damytýǵa, jańa jumys oryndaryn ashýǵa jáne halyqtyń tabysyn arttyrýǵa múmkindik beredi.
Halyqty elektrondyq kommertsııaǵa oqytýdy jumysqa ornalasý múmkindikterimen ushtastyrý da mańyzdy. Osy maqsatta qaıta daıarlaý men kásibı daǵdylardy jetildirýge arnalǵan Upskilling platformasyn iske qosý josparlanyp otyr. Ol jumyspen qamtý platformalarymen ıntegratsııalanady.
Aıta keteıik, Memleket basshysy Qasym-Jomart Toqaev Halyqqa Joldaýynda azamattardyń smartfon arqyly tabys tabýyna múmkindik jasaýdy tapsyrǵan edi.
Buǵan deıin J.Mádıev eldegi sý qoımalary men qalalardyń tsıfrlyq syńarlary jasalatynyn aıtty.
